zulf ke sanwarne mein der kitni lagti hai

zulf ke sañvarne meñ der kitnī lagtī hai

aadmī ke marne meñ der kitnī lagtī hai

aañkh se bhalā dil kā fāsla hī kitnā hai

sīḌhiyāñ utarne meñ der kitnī lagtī hai

pattharoñ pe chaltā huuñ kāñch kā badan le kar

kirchiyāñ bikharne meñ der kitnī lagtī hai

hai duā yahī merī badduā se bach jaao

āh-e-sard bharne meñ der kitnī lagtī hai

daf.atan sarak jaanā chehre se naqāb us kā

chāñd ke ubharne meñ der kitnī lagtī hai

phuul sī javānī hai shoḳhiyāñ nahīñ achchhī

pattiyāñ bikharne meñ der kitnī lagtī hai

vo 'nasīr' merā thā aaj raat se pahle

raat ke guzarne meñ der kitnī lagtī hai

zulf ke sanwarne mein der kitni lagti hai

aadmi ke marne mein der kitni lagti hai

aankh se bhala dil ka fasla hi kitna hai

siDhiyan utarne mein der kitni lagti hai

pattharon pe chalta hun kanch ka badan le kar

kirchiyan bikharne mein der kitni lagti hai

hai dua yahi meri baddua se bach jao

aah-e-sard bharne mein der kitni lagti hai

dafatan sarak jaana chehre se naqab us ka

chand ke ubharne mein der kitni lagti hai

phul si jawani hai shoKHiyan nahin achchhi

pattiyan bikharne mein der kitni lagti hai

wo 'nasir' mera tha aaj raat se pahle

raat ke guzarne mein der kitni lagti hai