zulf mein be-naqab hai aariz

zulf meñ be-naqāb hai aariz

rashk-e-sad-āftāb hai aariz

maiñ musalmāñ huuñ farz hai bosa

mus.haf-e-lā-javāb hai aariz

mehr-o-mah naam jis ke dhūon kā

laakh meñ intiḳhāb hai aariz

hātimī ḳhatm hai adū ke liye

yaanī bosa-ma.āb hai aariz

ḳhud-numā hai vo māh-rū lekin

kuchh hayā kuchh shabāb hai aariz

daaġh chechak ke sifr-e-husn hue

daulat-e-be-hisāb hai aariz

husn ko da.avā-e-payāmabrī

aur us kī kitāb hai aariz

rad na kiije savāl bose kā

makramat intisāb hai aariz

ye na ho to vo ḳhud mileñ 'rāsiḳh'

shauq-e-nā-kāmyāb hai aariz

zulf mein be-naqab hai aariz

rashk-e-sad-aftab hai aariz

main musalman hun farz hai bosa

mushaf-e-la-jawab hai aariz

mehr-o-mah nam jis ke dhuon ka

lakh mein intiKHab hai aariz

hatimi KHatm hai adu ke liye

yani bosa-maab hai aariz

KHud-numa hai wo mah-ru lekin

kuchh haya kuchh shabab hai aariz

dagh chechak ke sifr-e-husn hue

daulat-e-be-hisab hai aariz

husn ko dawa-e-payamabri

aur us ki kitab hai aariz

rad na kije sawal bose ka

makramat intisab hai aariz

ye na ho to wo KHud milen 'rasiKH'

shauq-e-na-kaamyab hai aariz