zulf suljhai unki shane se

zulf suljhā.ī un kī shāne se

mujh se bigḌe isī bahāne se

dil hī qaabū se mere jaatā hai

baaz aaya maiñ dil lagāne se

likkhā taqdīr kā are nādāñ

kahīñ miTtā bhī hai miTāne se

mil ga.e dil ko dāġh-hā-e-diram

ḳhusrav-e-ishq ke ḳhazāne se

shab ko mahfil meñ dekh kar mujh ko

uTh gayā niiñd ke bahāne se

kyā milegā falak tujhe batlā

bekasoñ ke are satāne se

dekh kar rāt-din kī nairangī

aa gayā tang maiñ zamāne se

dar-ba-dar phirte kis liye lekin

sab haiñ nā-chār āb-o-dāne se

apne qātil ke rū-ba-rū 'ḳhanjar'

moḌnā muñh na sar jhukāne se

zulf suljhai un ki shane se

mujh se bigDe isi bahane se

dil hi qabu se mere jata hai

baz aaya main dil lagane se

likkha taqdir ka are nadan

kahin miTta bhi hai miTane se

mil gae dil ko dagh-ha-e-diram

KHusraw-e-ishq ke KHazane se

shab ko mahfil mein dekh kar mujh ko

uTh gaya nind ke bahane se

kya milega falak tujhe batla

bekason ke are satane se

dekh kar raat-din ki nairangi

aa gaya tang main zamane se

dar-ba-dar phirte kis liye lekin

sab hain na-chaar aab-o-dane se

apne qatil ke ru-ba-ru 'KHanjar'

moDna munh na sar jhukane se