zulfon ka bikharna ek to bala, aariz ki jhalak phir waisi hi

zulfoñ kā bikharnā ik to balā, aariz kī jhalak phir vaisī hī

āñkhoñ kā maTaknā hosh-rubā, har ek palak phir vaisī hī

vo shoḳh jo guzre misl-e-sabā, to bhaḌke na kyūñ-kar ātish-e-dil

ik taur kī us kī jumbish-e-pā, dāman kī jhaTak phir vaisī hī

koī kyuuñ na garebāñ chaak kare ab dekh ke chhab ko us but kī

pinDe kā jhalaknā haa.e ḳhudā, cholī kī masak phir vaisī hī

dil kyuuñ na kare siine meñ tapish, jab yaar kī ho ye rāh-o-ravish

raftār meñ ik albelī adaa, aur qad kī lachak phir vaisī hī

ham kyuuñ na kaf afsos maleñ, jab ve hī tirā pā-bos kareñ

dāman se ziyāda band-e-qabā, zulfoñ kī laTak phir vaisī hī

vo maah chhupāyā tū ne kahāñ hai jis se jigar par daaġh mire

sūrat to dikhā de mujh ko zarā jaldī se falak phir vaisī hī

ai 'mus.hafī' mere haal pe ab kyūñ-kar na koī afsos kare

be-sāḳhta dil betāb huā aañsū kī Dhalak phir vaisī hī

zulfon ka bikharna ek to bala, aariz ki jhalak phir waisi hi

aankhon ka maTakna hosh-ruba, har ek palak phir waisi hi

wo shoKH jo guzre misl-e-saba, to bhaDke na kyun-kar aatish-e-dil

ek taur ki us ki jumbish-e-pa, daman ki jhaTak phir waisi hi

koi kyun na gareban chaak kare ab dekh ke chhab ko us but ki

pinDe ka jhalakna hae KHuda, choli ki masak phir waisi hi

dil kyun na kare sine mein tapish, jab yar ki ho ye rah-o-rawish

raftar mein ek albeli ada, aur qad ki lachak phir waisi hi

hum kyun na kaf afsos malen, jab we hi tera pa-bos karen

daman se ziyaada band-e-qaba, zulfon ki laTak phir waisi hi

wo mah chhupaya tu ne kahan hai jis se jigar par dagh mere

surat to dikha de mujh ko zara jaldi se falak phir waisi hi

ai 'mushafi' mere haal pe ab kyun-kar na koi afsos kare

be-saKHta dil betab hua aansu ki Dhalak phir waisi hi