zulm-o-jaur ko kab tak maslahat mein tolenge

zulm-o-jaur ko kab tak maslahat meñ toleñge

is sadī ke dānish-var kab zabān kholeñge

raas aa ga.ī jin ko bhiik āb-o-dāne kī

vo tuyūr ab hargiz bāl-o-par na kholeñge

be-hisī ke jazboñ ko ḳhuun kī zarūrat hai

kab zamīr jāgeñge kab avaam boleñge

ahl-e-kibr-o-naḳhvat kī apnī āstīnoñ meñ

vo jo saañp palte haiñ aur zahr gholeñge

chup rahe to zālim ko fursat-e-sitam hogī

ham qalam uThā.eñge ham zabān kholeñge

ahl-e-haft-kishvar ko aaj tak kī mohlat hai

kal zamīn ulTegī taḳht-o-tāj Doleñge

zulm-o-jaur ko kab tak maslahat mein tolenge

is sadi ke danish-war kab zaban kholenge

ras aa gai jin ko bhik aab-o-dane ki

wo tuyur ab hargiz baal-o-par na kholenge

be-hisi ke jazbon ko KHun ki zarurat hai

kab zamir jagenge kab awam bolenge

ahl-e-kibr-o-naKHwat ki apni aastinon mein

wo jo sanp palte hain aur zahr gholenge

chup rahe to zalim ko fursat-e-sitam hogi

hum qalam uThaenge hum zaban kholenge

ahl-e-haft-kishwar ko aaj tak ki mohlat hai

kal zamin ulTegi taKHt-o-taj Dolenge