zulm sale ne kiya ye dil-e-dil-gir ke sath

zulm saale ne kiyā ye dil-e-dil-gīr ke saath

rakh diyā bāñdh ke chhappar meñ use tiir ke saath

ġhair ko karke rihā yaar bhī tadbīr ke saath

de diyā sañkhiyā thoḌā sā use khiir ke saath

murshidī jaan kā muñh jis ne kiyā thā kaalā

aaj bhāgī hai mirā din bhī usī piir ke saath

vasl kā nīm-maza ho gayā hāsil mujh ko

raat bhar soyā lipaT kar tirī tasvīr ke saath

kī muqaddar kī shikāyat to harāmī ne kahā

terī taqdīr kā likkhā tirī taqdīr ke saath

is tarah phirtā huuñ us shoḳh ke pīchhe pīchhe

jaise itvār lagā rahtā hai har piir ke saath

le ke us shoḳh ko ārām se chhat par soyā

ġhair ko Daal diyā bāñdh ke shahtīr ke saath

phir to hāsil ho maza vasl kā duunā mujh ko

aqd ho jaa.e agar yaar kī ham-shīr ke saath

kam-sinī hī meñ huā shauq-e-asīrī paidā

barsoñ khelā huuñ maiñ darvāze kī zanjīr ke saath

is tarah jumbisheñ de de ke nikālā us ko

aa gayā dil bhī mirā khīñch ke tire tiir ke saath

'būm' sāhab kā yahī mashġhala hai aahaT par

dil ko bahlātā hai har dam tirī tasvīr ke saath

zulm sale ne kiya ye dil-e-dil-gir ke sath

rakh diya bandh ke chhappar mein use tir ke sath

ghair ko karke riha yar bhi tadbir ke sath

de diya sankhiya thoDa sa use khir ke sath

murshidi jaan ka munh jis ne kiya tha kala

aaj bhagi hai mera din bhi usi pir ke sath

wasl ka nim-maza ho gaya hasil mujh ko

raat bhar soya lipaT kar teri taswir ke sath

ki muqaddar ki shikayat to harami ne kaha

teri taqdir ka likkha teri taqdir ke sath

is tarah phirta hun us shoKH ke pichhe pichhe

jaise itwar laga rahta hai har pir ke sath

le ke us shoKH ko aaram se chhat par soya

ghair ko Dal diya bandh ke shahtir ke sath

phir to hasil ho maza wasl ka duna mujh ko

aqd ho jae agar yar ki ham-shir ke sath

kam-sini hi mein hua shauq-e-asiri paida

barson khela hun main darwaze ki zanjir ke sath

is tarah jumbishen de de ke nikala us ko

aa gaya dil bhi mera khinch ke tere tir ke sath

'bum' sahab ka yahi mashghala hai aahaT par

dil ko bahlata hai har dam teri taswir ke sath