zulmat-e-shab-e-hijr ki aafat hai aur tu

zulmāt-e-shab-e-hijr kī āfāt hai aur tū

jo dam hai ġhanīmat hai ki phir raat hai aur to

ik ham se hī milne meñ ta.ammul hai vagarna

ġhairoñ se vahī terī mulāqāt hai aur tū

yaañ roz-e-siyāh o shab-e-tārīk hai aur ham

vaañ ā.īna-e-bāġh-e-tilismāt hai aur tū

mar jaane kī jā hai ki sanam do do pahar tak

har ik se sar-e-bām ishārāt hai aur tū

sau bāteñ huiiñ to na milā apne se ai dil

kyā baat hai terī ki vahī baat hai aur tū

ne huur na insāñ na parī aur na farishta

jis husn o sabāhat meñ tirī gaat hai aur tū

zindān-e-firāq o lab-e-ḳhāmosh hai aur ham

sair-e-chaman o harf-o-hikāyāt hai aur tū

hovegā na ye hasti-e-fānī kā bakheḌā

ik roz ye hogā ki tirī zaat hai aur tū

naumīd na ho hijr meñ ai 'mus.hafī' us se

do din ko vahī lutf-o-ināyāt hai aur tū

kuḌh mat ki farāġhat kī bhī aa jaa.e hai saa.at

phir maan divāne vahī auqāt hai aur tū

zulmat-e-shab-e-hijr ki aafat hai aur tu

jo dam hai ghanimat hai ki phir raat hai aur to

ek hum se hi milne mein tammul hai wagarna

ghairon se wahi teri mulaqat hai aur tu

yan roz-e-siyah o shab-e-tarik hai aur hum

wan aaina-e-bagh-e-tilismat hai aur tu

mar jaane ki ja hai ki sanam do do pahar tak

har ek se sar-e-baam ishaaraat hai aur tu

sau baaten huin to na mila apne se ai dil

kya baat hai teri ki wahi baat hai aur tu

ne hur na insan na pari aur na farishta

jis husn o sabahat mein teri gat hai aur tu

zindan-e-firaq o lab-e-KHamosh hai aur hum

sair-e-chaman o harf-o-hikayat hai aur tu

howega na ye hasti-e-fani ka bakheDa

ek roz ye hoga ki teri zat hai aur tu

naumid na ho hijr mein ai 'mushafi' us se

do din ko wahi lutf-o-inayat hai aur tu

kuDh mat ki faraghat ki bhi aa jae hai saat

phir man diwane wahi auqat hai aur tu