zulmat ba-har-maqam KHilaf-e-talab mili

zulmat ba-har-maqām ḳhilāf-e-talab milī

din kā surāġh DhūñDne vāloñ ko shab milī

ai dost tere husn-e-ināyat kī ḳhair ho

ye āgahī hameñ tire ġham ke sabab milī

yād-e-ġhazal-ruḳhāñ bhī ḳhayāl-e-ma.āsh bhī

āsūdgī dayār-e-tamanna meñ kab milī

nikle the tīrgī ke musalsal fareb se

jab raushnī milī to hameñ jāñ-ba-lab milī

qissa tirī vafā kā sitam rozgār ke

jo shai hameñ milī hai vahī muntaḳhab milī

fursat-talab masā.il-e-asr-e-ravāñ bhī the

lekin tire ḳhayāl se fursat hī kab milī

sultān-'rashk' ḳhud se shanāsā.ī ke liye

dekheñge ḳhvāb fursat-e-tābīr jab milī

zulmat ba-har-maqam KHilaf-e-talab mili

din ka suragh DhunDne walon ko shab mili

ai dost tere husn-e-inayat ki KHair ho

ye aagahi hamein tere gham ke sabab mili

yaad-e-ghazal-ruKHan bhi KHayal-e-maash bhi

aasudgi dayar-e-tamanna mein kab mili

nikle the tirgi ke musalsal fareb se

jab raushni mili to hamein jaan-ba-lab mili

qissa teri wafa ka sitam rozgar ke

jo shai hamein mili hai wahi muntaKHab mili

fursat-talab masail-e-asr-e-rawan bhi the

lekin tere KHayal se fursat hi kab mili

sultan-'rashk' KHud se shanasai ke liye

dekhenge KHwab fursat-e-tabir jab mili