choTon pe choT dete hi jaane ka shukriya

choToñ pe choT dete hī jaane kā shukriya

patthar ko but kī shakl meñ laane kā shukriya

jaagā rahā to maiñ ne na.e kaam kar liye

ai niiñd aaj tere na aane kā shukriya

sūkhā purānā zaḳhm na.e ko jagah milī

svāgat na.e kā aur purāne kā shukriya

ātīñ na tum to kyuuñ maiñ banātā ye sīḌhiyāñ

dīvāro merī raah meñ aane kā shukriya

aañsū sā maañ kī god meñ aa kar simaT gayā

nazroñ se apnī mujh ko girāne kā shukriya

ab ye huā ki duniyā hī lagtī hai mujh ko ghar

yuuñ mere ghar meñ aag lagāne kā shukriya

ġham milte haiñ to aur nikhartī hai shā.erī

ye baat hai to saare zamāne kā shukriya

ab mujh ko aa ga.e haiñ manāne ke sab hunar

yuuñ mujh 'kuñvar' se ruuTh ke jaane kā shukriya

choTon pe choT dete hi jaane ka shukriya

patthar ko but ki shakl mein lane ka shukriya

jaga raha to main ne nae kaam kar liye

ai nind aaj tere na aane ka shukriya

sukha purana zaKHm nae ko jagah mili

swagat nae ka aur purane ka shukriya

aatin na tum to kyun main banata ye siDhiyan

diwaro meri rah mein aane ka shukriya

aansu sa man ki god mein aa kar simaT gaya

nazron se apni mujh ko girane ka shukriya

ab ye hua ki duniya hi lagti hai mujh ko ghar

yun mere ghar mein aag lagane ka shukriya

gham milte hain to aur nikharti hai shaeri

ye baat hai to sare zamane ka shukriya

ab mujh ko aa gae hain manane ke sab hunar

yun mujh 'kunwar' se ruTh ke jaane ka shukriya