dekhiye na tez kitni umr ki raftar hai

dekhiye nā tez kitnī umr kī raftār hai

zindagī meñ chain kam aur farz kī bhar-mār hai

be-vajah kī raar se kitnā laḌe āḳhir koī

ek mushkil se bache to dūsrī tayyār hai

ho parāyā gar koī to dushmanī manzūr hai

aaj apnoñ se laḌe to jiit meñ bhī haar hai

ab jahāñ meñ ḳhuun ke rishte kahāñ baaqī rahe

ḳhuun ke rishtoñ meñ bahtī ḳhuun kī ab dhaar hai

bol mīThe bhī kahāñ ab boltā koī yahāñ

har zabāñ pe aaj keval saañp kī phunkār hai

dil dukhāyā thā jinhoñne vo parā.e to na the

aaj kaise maan leñ ki un ko ham se pyaar hai

koī bhī aisā nahīñ jo maut se bach jā.egā

āḳhirī manzil sabhī kī maut ke us paar hai

dekhiye na tez kitni umr ki raftar hai

zindagi mein chain kam aur farz ki bhar-mar hai

be-wajah ki rar se kitna laDe aaKHir koi

ek mushkil se bache to dusri tayyar hai

ho paraya gar koi to dushmani manzur hai

aaj apnon se laDe to jit mein bhi haar hai

ab jahan mein KHun ke rishte kahan baqi rahe

KHun ke rishton mein bahti KHun ki ab dhaar hai

bol miThe bhi kahan ab bolta koi yahan

har zaban pe aaj kewal sanp ki phunkar hai

dil dukhaya tha jinhonne wo parae to na the

aaj kaise man len ki un ko hum se pyar hai

koi bhi aisa nahin jo maut se bach jaega

aaKHiri manzil sabhi ki maut ke us par hai