ishq mein kya bataen ki donon kis qadar choT khae hue hain

ishq meñ kyā batā.eñ ki donoñ kis qadar choT khaa.e hue haiñ

maut ne un ko maarā hai aur ham zindagī ke satā.e hue haiñ

ek aañsū na palkoñ se Tapke ye vafā kā taqāza hai varna

dosto ham bhī āñkhoñ meñ apnī gañgā jamunā chhupā.e hue haiñ

dekh saaqī tere mai-kade kā kitnā pahuñchā huā rind huuñ maiñ

jitne aa.e haiñ mayyat meñ merī sab ke sab hī lagā.e hue haiñ

ai lahad apnī miTTī se kah de daaġh lagne na paa.e kafan ko

aaj hī ham ne badle haiñ kapḌe aaj hī ham nahā.e hue haiñ

us ne shādī kā joḌā pahan kar sirf chūmā thā mere kafan ko

bas usī din se jannat meñ hūreñ mujh ko dūlhā banā.e hue haiñ

ġham to ye hai ki jin shā.iroñ kī baat bhī zindagī bhar na pūchhī

ba.ad marne ke 'aḳhlāq' un ko log sar pe uThā.e hue haiñ

ishq mein kya bataen ki donon kis qadar choT khae hue hain

maut ne un ko mara hai aur hum zindagi ke satae hue hain

ek aansu na palkon se Tapke ye wafa ka taqaza hai warna

dosto hum bhi aankhon mein apni ganga jamuna chhupae hue hain

dekh saqi tere mai-kade ka kitna pahuncha hua rind hun main

jitne aae hain mayyat mein meri sab ke sab hi lagae hue hain

ai lahad apni miTTi se kah de dagh lagne na pae kafan ko

aaj hi hum ne badle hain kapDe aaj hi hum nahae hue hain

us ne shadi ka joDa pahan kar sirf chuma tha mere kafan ko

bas usi din se jannat mein huren mujh ko dulha banae hue hain

gham to ye hai ki jin shairon ki baat bhi zindagi bhar na puchhi

baad marne ke 'aKHlaq' un ko log sar pe uThae hue hain