meri parwaz

yahāñ aayā thā ik havā.ī jahāz

khule jis ke aane se uḌne ke raaz

'ajab us kī shoḳhī-e-parvāz thī

hamesha falak par tag-o-tāz thī

mujhe bhī milā thā dil-e-be-qarār

to hotā na kyoñ maiñ bhī us par savār

zamīñ par jo rah rah ke uktā gayā

to uḌne uḌāne pe dil aa gayā

ġharaz maiñ bhī tayyāre meñ baiTh kar

huā garm-e-parvāz aflāk par

tamanna jo parvāz kī dil meñ thī

mujhe jānib-e-āsmāñ le uḌī

ye ghan-ghan ye ghar-ghar ye farfar kā shor

ye pnkhe kā chakkar ye mahshar kā shor

ye uThne lagā dandanātā huā

ye uḌne lagā pech khātā huā

ye taḳht-e-sulaimāñ ravāna huā

falak is kā ab shāmiyāna huā

sutūn-e-havā ko chalā kāTtā

ye tesha hai goyā ki farhād kā

jo ye bādaloñ ko bhī detā hai chiir

ye arjun kā rath hai ki rustam kā tiir

parī kī tarah uḌ rahā hai ye saaf

fazā is ke haq meñ banī koh-e-qāf

dar-e-charḳh is ke liye baaz hai

ye ḳhāk-e-rah-e-kushta-e-nāz hai

'ajab is ke uḌne kā andāz hai

humā hai ye hudhud hai yā baaz hai

ye pīl-e-damāñ hai havā par ravāñ

ḳhushā aadmī kā ye 'azm-e-javāñ

sū-e-yār jaatā hai ye nāma-bar

mire nāma-bar ko lage bāl-o-par

havāoñ ke dariyā kī kashtī hai ye

fazā ke samundar kī machhlī hai ye

fazā meñ havā kā ye jhoñkā banā

hamāre liye ye hiñDolā banā

pare dasht-o-dariyā ke uḌtā phirā

palaTtā phirā aur muḌtā phirā

gayā jis tarah sū-e-‘arsh-e-barīñ

phir aayā usī tarh sū-e-zamīñ

ġharaz sair kar ke utar aa.e ham

na.e marhaloñ se guzar aa.e ham

yahan aaya tha ek hawai jahaz

khule jis ke aane se uDne ke raaz

'ajab us ki shoKHi-e-parwaz thi

hamesha falak par tag-o-taz thi

mujhe bhi mila tha dil-e-be-qarar

to hota na kyon main bhi us par sawar

zamin par jo rah rah ke ukta gaya

to uDne uDane pe dil aa gaya

gharaz main bhi tayyare mein baiTh kar

hua garm-e-parwaz aflak par

tamanna jo parwaz ki dil mein thi

mujhe jaanib-e-asman le uDi

ye ghan-ghan ye ghar-ghar ye farfar ka shor

ye pnkhe ka chakkar ye mahshar ka shor

ye uThne laga dandanata hua

ye uDne laga pech khata hua

ye taKHt-e-sulaiman rawana hua

falak is ka ab shamiyana hua

sutun-e-hawa ko chala kaTta

ye tesha hai goya ki farhad ka

jo ye baadalon ko bhi deta hai chir

ye arjun ka rath hai ki rustam ka tir

pari ki tarah uD raha hai ye saf

faza is ke haq mein bani koh-e-qaf

dar-e-charKH is ke liye baz hai

ye KHak-e-rah-e-kushta-e-naz hai

'ajab is ke uDne ka andaz hai

huma hai ye hudhud hai ya baz hai

ye pil-e-daman hai hawa par rawan

KHusha aadmi ka ye 'azm-e-jawan

su-e-yar jata hai ye nama-bar

mere nama-bar ko lage baal-o-par

hawaon ke dariya ki kashti hai ye

faza ke samundar ki machhli hai ye

faza mein hawa ka ye jhonka bana

hamare liye ye hinDola bana

pare dasht-o-dariya ke uDta phira

palaTta phira aur muDta phira

gaya jis tarah su-e-‘arsh-e-barin

phir aaya usi tarh su-e-zamin

gharaz sair kar ke utar aae hum

nae marhalon se guzar aae hum