aamadani aur KHarch

kirāya makāñ kā adā karne jā.ūñ

ki bazzāz o ḳhayyāt kā bil chukā.ūñ

davā lā.ūñ yā doctor ko bulā.ūñ

ki maiñ tex vāloñ se pīchhā chhuḌā.ūñ

ḳhudā-rā batāo kahāñ bhaag jā.ūñ

maiñ is DheḌh aane meñ kyā kyā banā.ūñ

bahut baḌh gayā hai makāñ kā kirāya

idhar nal ke āb-e-ravāñ kā kirāya

baqāyā hai 'barq-e-tapāñ' kā kirāya

zamīñ par hai ab āsmāñ kā kirāya

hai bachchoñ kī fees aur chanda zarūrī

kutub copiyoñ kā pulanda zarūrī

shikam-parvarī kā hai dhanda zarūrī

ye aadam kī ījād-e-banda zarūrī

balā ke masārif haiñ kyā taab lā.ūñ

maiñ is DheḌh aane meñ kyā kyā banā.ūñ

azīzoñ kī imdād mehmāñ-navāzī

ġharīboñ ko ḳhairāt ehsāñ-tarāzī

ḳhurāk aur poshāk meñ duniyā-sāzī

idhar film kā shauq aur udhar ishq-bāzī

zarūrī yahāñ cigarette aur paan bhī hai

adālat meñ jaane kā imkān bhī hai

hai bhañgī bhī dhobī bhī darbān bhī hai

aur ik saaḌī vaale kī dūkān bhī hai

kahāñ jā.ūñ kis kis se pīchhā chhuḌā.ūñ

maiñ is DheḌh aane meñ kyā kyā banā.ūñ

haiñ mele bhī islāmī tyauhār bhī haiñ

ham aise mavāqe pe ḳhuddār bhī haiñ

bahut ḳharch karne ko tayyār bhī haiñ

balā se jo be-barg-o-be-bār bhī haiñ

kise dāstān-e-masārif sunā.ūñ

maiñ is DheḌh aane meñ kyā kyā banā.ūñ

kiraya makan ka ada karne jaun

ki bazzaz o KHayyat ka bil chukaun

dawa laun ya doctor ko bulaun

ki main tex walon se pichha chhuDaun

KHuda-ra batao kahan bhag jaun

main is DheDh aane mein kya kya banaun

bahut baDh gaya hai makan ka kiraya

idhar nal ke aab-e-rawan ka kiraya

baqaya hai 'barq-e-tapan' ka kiraya

zamin par hai ab aasman ka kiraya

hai bachchon ki fees aur chanda zaruri

kutub copiyon ka pulanda zaruri

shikam-parwari ka hai dhanda zaruri

ye aadam ki ijad-e-banda zaruri

bala ke masarif hain kya tab laun

main is DheDh aane mein kya kya banaun

azizon ki imdad mehman-nawazi

gharibon ko KHairaat ehsan-taraazi

KHurak aur poshak mein duniya-sazi

idhar film ka shauq aur udhar ishq-bazi

zaruri yahan cigarette aur pan bhi hai

adalat mein jaane ka imkan bhi hai

hai bhangi bhi dhobi bhi darban bhi hai

aur ek saDi wale ki dukan bhi hai

kahan jaun kis kis se pichha chhuDaun

main is DheDh aane mein kya kya banaun

hain mele bhi islami tyauhaar bhi hain

hum aise mawaqe pe KHuddar bhi hain

bahut KHarch karne ko tayyar bhi hain

bala se jo be-barg-o-be-bar bhi hain

kise dastan-e-masarif sunaun

main is DheDh aane mein kya kya banaun