agarche hathiyar se hain Darte magar irade baDe baDe hain

agarche hathiyār se haiñ Darte magar irāde baḌe baḌe haiñ

mile hameñ taḳht varna taḳhta ham apnī is baat par aḌe haiñ

agarche hathiyār dekhte hī ḳharāb hotī hai apnī dhotī

qalam se maidān-e-kāġhzī meñ hamesha sarkār se laḌe haiñ

agarche rahte haiñ jhoñpaḌoñ meñ par ḳhvāb mahloñ ke dekhte haiñ

saḌī galī machhlī khāte khāte dimāġh ham logoñ ke saḌe haiñ

hamesha sarkār-e-englishiya ko paanī pī pī ke koste haiñ

agarche dil haiñ hamāre buude magar zabāñ ke to ham baḌe haiñ

tuyūr-e-europe kī dekhā-dekhī hai shauq-e-parvāz ab hameñ bhī

agarche muddat se par hamāre creze-e-adbār se jhaḌe haiñ

sudeshī kī karte haiñ himāyat ki band ho londonī tijārat

qadam ukhaḌ jaa.eñ sāhiboñ ke jo arse se hind meñ gaḌe haiñ

kare koī ham pe laakh ehsāñ ham us ko māneñ ye kyā hai imkāñ

phisal paḌe jin pe buuñd paḌ kar vo un meñ chikne ham ghaḌe haiñ

sadā se the ham vahūsh-sīrat ġharīq-e-dariyā-e-jahl-e-zillat

jo paḌh ke añgrezī paa.ī izzat to zarf thā tañg ubal paḌe haiñ

agar sedition ke jurm meñ ham prison jaa.eñ to kuchh nahīñ ġham

ham apnī kaḌiyoñ ko beḌiyoñ ko ye samjheñge ye kaḌe chhaḌe haiñ

kiyā na ham ne ye kaam thoḌā ki sarfalar ko nikāl chhoḌā

hue haiñ ham kāmyāb aksar agar kisī baat par aḌe haiñ

kahā hai islāmiyoñ se ham ne ki apnā bhaa.ī hameñ samajhiye

jo kaam lenā hai ham ko un se to kaise fiqre unheñ jaḌe haiñ

ġharaz ki vaqtoñ meñ ham ne aksar lagā.ī hai muslimoñ se yaarī

magar ġharaz jab rahī na baaqī to un se nāhaq ulajh paḌe haiñ

navāb Dhāka kī hai ban aa.ī surendarnāth kī duhā.ī

hamārī shirkat se muslimoñ ko vo rokne ke liye khaḌe haiñ

agarche hathiyar se hain Darte magar irade baDe baDe hain

mile hamein taKHt warna taKHta hum apni is baat par aDe hain

agarche hathiyar dekhte hi KHarab hoti hai apni dhoti

qalam se maidan-e-kaghzi mein hamesha sarkar se laDe hain

agarche rahte hain jhonpaDon mein par KHwab mahlon ke dekhte hain

saDi gali machhli khate khate dimagh hum logon ke saDe hain

hamesha sarkar-e-englishiya ko pani pi pi ke koste hain

agarche dil hain hamare bude magar zaban ke to hum baDe hain

tuyur-e-europe ki dekha-dekhi hai shauq-e-parwaz ab hamein bhi

agarche muddat se par hamare creze-e-adbar se jhaDe hain

sudeshi ki karte hain himayat ki band ho londoni tijarat

qadam ukhaD jaen sahibon ke jo arse se hind mein gaDe hain

kare koi hum pe lakh ehsan hum us ko manen ye kya hai imkan

phisal paDe jin pe bund paD kar wo un mein chikne hum ghaDe hain

sada se the hum wahush-sirat ghariq-e-dariya-e-jahl-e-zillat

jo paDh ke angrezi pai izzat to zarf tha tang ubal paDe hain

agar sedition ke jurm mein hum prison jaen to kuchh nahin gham

hum apni kaDiyon ko beDiyon ko ye samjhenge ye kaDe chhaDe hain

kiya na hum ne ye kaam thoDa ki sarfalar ko nikal chhoDa

hue hain hum kaamyab aksar agar kisi baat par aDe hain

kaha hai islamiyon se hum ne ki apna bhai hamein samajhiye

jo kaam lena hai hum ko un se to kaise fiqre unhen jaDe hain

gharaz ki waqton mein hum ne aksar lagai hai muslimon se yari

magar gharaz jab rahi na baqi to un se nahaq ulajh paDe hain

nawab Dhaka ki hai ban aai surendarnath ki duhai

hamari shirkat se muslimon ko wo rokne ke liye khaDe hain