biwi ke huzur

ishq kā naas karogī mujhe ma.alūm na thā

mere palle hī paḌogī mujhe ma.alūm na thā

ik mahīne meñ kamātā huuñ jo tanḳhvāh use

ḳharch hafte meñ karogī mujhe ma.alūm na thā

maiñ ne khaa.ī thī qasam khā.ūñgā bas rizq-e-halāl

tum bhī ahmaq hī kahogī mujhe ma.alūm na thā

sher kī tarah sadā arz karūñgā ḳhud ko

tum sadā hukm hī dogī mujhe ma.alūm na thā

jo sunāogī sunūñgā maiñ hamesha lekin

sher tak tum na sunogī mujhe ma.alūm na thā

zindagī hī meñ mujhe dekhnā hogā ye din

mujh ko marhūm likhogī mujhe ma.alūm na thā

saarī daf.āt hī ho jā.eñgī laagū mujh par

itne ilzām dharogī mujhe ma.alūm na thā

iid ke din bhī vahī jañg kā naqsha hogā

iid ke din bhī laḌogī mujhe ma.alūm na thā

saḳht-jānī meñ bhī niklogī misālī ya.anī

maar kar mujh ko marogī mujhe ma.alūm na thā

pata hotā to na kartā kabhī koī nekī

tumhīñ jannat meñ milogī mujhe ma.alūm na thā

ishq ka nas karogi mujhe malum na tha

mere palle hi paDogi mujhe malum na tha

ek mahine mein kamata hun jo tanKHwah use

KHarch hafte mein karogi mujhe malum na tha

main ne khai thi qasam khaunga bas rizq-e-halal

tum bhi ahmaq hi kahogi mujhe malum na tha

sher ki tarah sada arz karunga KHud ko

tum sada hukm hi dogi mujhe malum na tha

jo sunaogi sununga main hamesha lekin

sher tak tum na sunogi mujhe malum na tha

zindagi hi mein mujhe dekhna hoga ye din

mujh ko marhum likhogi mujhe malum na tha

sari dafat hi ho jaengi lagu mujh par

itne ilzam dharogi mujhe malum na tha

id ke din bhi wahi jang ka naqsha hoga

id ke din bhi laDogi mujhe malum na tha

saKHt-jaani mein bhi niklogi misali yani

mar kar mujh ko marogi mujhe malum na tha

pata hota to na karta kabhi koi neki

tumhin jannat mein milogi mujhe malum na tha