dil surgery ke baad koi dil nahin raha

dil surgery ke ba.ad koī dil nahīñ rahā

ġham kī bhī ghaas khāne ke qābil nahīñ rahā

merī masarratoñ kā sabab bas yahī to hai

maiñ rishvatoñ ke biich meñ haa.il nahīñ rahā

munsif hai kaun kaisī adālat kahāñ kā sach

qātil bhī kah rahā hai ki qātil nahīñ rahā

us ke hī roz-o-shab haiñ vahī kāmyāb hai

jo ḳhud hī apne qaul kā qaa.il nahīñ rahā

pahchān saarī bah ga.ī sailāb-e-shahr meñ

gaañv ke jauhaḌoñ meñ bhī sāhil nahīñ rahā

paise kā mol-tol hai ab ishq kā nahīñ

mahbūb bhī bharose ke qābil nahīñ rahā

is ḳhauf se ki biivī uḌā le kahīñ na jeb

soyā to maiñ zarūr thā ġhāfil nahīñ rahā

nazreñ uThā ke dekhiye ki ab to darmiyāñ

parda vo moTe TaaT kā haa.il nahīñ rahā

dil kā payām phone par ham kis tarah se deñ

choñgā hī sirf rah gayā Dial nahīñ rahā

jab se akaḌ ke 'rāz' maiñ paḌhne lagā huuñ sher

maiñ bhī paḌhe likhoñ meñ huuñ jāhil nahīñ rahā

dil surgery ke baad koi dil nahin raha

gham ki bhi ghas khane ke qabil nahin raha

meri masarraton ka sabab bas yahi to hai

main rishwaton ke bich mein hail nahin raha

munsif hai kaun kaisi adalat kahan ka sach

qatil bhi kah raha hai ki qatil nahin raha

us ke hi roz-o-shab hain wahi kaamyab hai

jo KHud hi apne qaul ka qail nahin raha

pahchan sari bah gai sailab-e-shahr mein

ganw ke jauhaDon mein bhi sahil nahin raha

paise ka mol-tol hai ab ishq ka nahin

mahbub bhi bharose ke qabil nahin raha

is KHauf se ki biwi uDa le kahin na jeb

soya to main zarur tha ghafil nahin raha

nazren uTha ke dekhiye ki ab to darmiyan

parda wo moTe TaT ka hail nahin raha

dil ka payam phone par hum kis tarah se den

chonga hi sirf rah gaya Dial nahin raha

jab se akaD ke 'raaz' main paDhne laga hun sher

main bhi paDhe likhon mein hun jahil nahin raha