dum

'saġhar' kahāñ se aa ga.ī dil meñ dumoñ kī baat

dum ke baġhair aadmī lagtā hai vāhiyāt

milte haiñ ahl-e-fan ko yahīñ se muharrikāt

hotī thī dum subūt meñ is ke mohāvrāt

ustād kah rahe the chhurā dil pe chal gayā

dum par hamārī paañv vo rakh kar nikal gayā

hotī thī ik zamāne meñ har aadmī ke dum

be-imtiyāz-e-maz.hab-o-millat sabhī ke dum

phūle nahīñ samātī thī maare ḳhushī ke dum

gardan meñ Daale phirte the āshiq kisī ke dum

jaatā thā jab safar pe koī dum hilāte the

ik dūsre se haath nahīñ dum milāte the

hotā jo in dinoñ kahīñ dum-dār aadmī

kartā dumoñ se ishq kā iz.hār aadmī

rakhtā barā-e-hifz na hathiyār aadmī

dum ko chalātā jaan ke talvār aadmī

kyuuñ jūtiyāñ barstīñ kisī bad-ḳhisāl par

ma.ashūq dum ko mārte āshiq ke gaal par

chaḌhtā hai zehn-e-ishq pe jab ishq kā buḳhār

dil se ziyāda dum nazar aatī hai be-qarār

moTī dumoñ se hotā hai akasr sabhī ko pyaar

ik dum ke pīchhe hote haiñ dum-chhalle be-shumār

kyā thī ḳhabar ye rishta-e-jāñ TuuT jā.egā

hāthoñ se merī dum kā sirā chhūT jā.egā

sho.ala barā-e-ishq bhaḌaktā nahīñ koī

kam-zarf mai-kade meñ chhalaktā nahīñ koī

TeḌhī dumoñ ke saath aTaktā nahīñ koī

uljhī dumoñ ke paas phaTaktā nahīñ koī

ik dum bahut hai saare shayātīn ke liye

kitnī zarūrī shai hai ḳhvātīn ke liye

ham bhī unhīñ damoñ ke hamesha se fan haiñ

izzat haiñ ḳhāndāñ kī jo mahfil kī zain haiñ

ThanDak haiñ chashm-e-tar kī kaleje kā chain haiñ

'saġhar' shab-e-firāq ye āshiq ke bain haiñ

rakhiye ḳhudā ke vāste dum ko ġhilāf meñ

kal shab Tahal rahī thī hamāre lihāf meñ

sau fā.ede dumoñ ke haiñ kyā kyā ginā.iye

taare falak se toḌ ke dhartī pe lā.iye

phunne se dum ke chehre pe powder lagā.iye

chamcha na ho to chaa.e bhī dum se chalā.iye

vo hī maqām-e-'ġhālib'-o-'iqbāl' pā.eñge

moTī dumoñ ke sāmne jo dum hilā.eñge

'saghar' kahan se aa gai dil mein dumon ki baat

dum ke baghair aadmi lagta hai wahiyat

milte hain ahl-e-fan ko yahin se muharrikat

hoti thi dum subut mein is ke mohawraat

ustad kah rahe the chhura dil pe chal gaya

dum par hamari panw wo rakh kar nikal gaya

hoti thi ek zamane mein har aadmi ke dum

be-imtiyaz-e-mazhab-o-millat sabhi ke dum

phule nahin samati thi mare KHushi ke dum

gardan mein Dale phirte the aashiq kisi ke dum

jata tha jab safar pe koi dum hilate the

ek dusre se hath nahin dum milate the

hota jo in dinon kahin dum-dar aadmi

karta dumon se ishq ka izhaar aadmi

rakhta bara-e-hifz na hathiyar aadmi

dum ko chalata jaan ke talwar aadmi

kyun jutiyan barstin kisi bad-KHisal par

mashuq dum ko marte aashiq ke gal par

chaDhta hai zehn-e-ishq pe jab ishq ka buKHar

dil se ziyaada dum nazar aati hai be-qarar

moTi dumon se hota hai akasr sabhi ko pyar

ek dum ke pichhe hote hain dum-chhalle be-shumar

kya thi KHabar ye rishta-e-jaan TuT jaega

hathon se meri dum ka sira chhuT jaega

shoala bara-e-ishq bhaDakta nahin koi

kam-zarf mai-kade mein chhalakta nahin koi

TeDhi dumon ke sath aTakta nahin koi

uljhi dumon ke pas phaTakta nahin koi

ek dum bahut hai sare shayatin ke liye

kitni zaruri shai hai KHwatin ke liye

hum bhi unhin damon ke hamesha se fan hain

izzat hain KHandan ki jo mahfil ki zain hain

ThanDak hain chashm-e-tar ki kaleje ka chain hain

'saghar' shab-e-firaq ye aashiq ke bain hain

rakhiye KHuda ke waste dum ko ghilaf mein

kal shab Tahal rahi thi hamare lihaf mein

sau faede dumon ke hain kya kya ginaiye

tare falak se toD ke dharti pe laiye

phunne se dum ke chehre pe powder lagaiye

chamcha na ho to chae bhi dum se chalaiye

wo hi maqam-e-'ghaalib'-o-'iqbaal' paenge

moTi dumon ke samne jo dum hilaenge