jo rahbar-e-aqvām se mausūm gad.he haiñ
kam-baḳht vo paidā.eshī mazlūm gad.he haiñ
āsā.ish-o-ārām se mahrūm gad.he haiñ
public kī tarah jitne bhī māsūm gad.he haiñ
izzat hai gadhoñ kī na Thikāna hai gadhoñ kā
leader yahī kahtā hai zamāna hai gadhoñ kā
fitrat sag-e-ḳhūñ-ḳhvār kī insān meñ aa.ī
ġhairoñ se mohabbat hai to apno se laḌā.ī
ḳhū-e-ḳhar-e-mazlūm bashar ne nahīñ paa.ī
kartā hai musalmāñ kī musalmān piTā.ī
muslim kī tarah koī bhī nādān nahīñ hai
sad-shukr ki ḳhar ik bhī musalmān nahīñ hai
ham ghaas kā shikva na talab daal kareñge
āvāz meñ paidā nayā sur-tāl kareñge
mil-jul ke gad.he zulm ko pāmāl kareñge
insāñ kī baqā ke liye haḌtāl kareñge
ai rāhbaro chain se jiine nahīñ deñge
insāñ kā lahū aap ko piine nahīñ deñge
leader hai vo ġhunDoñ ko jo sardār banā.e
insāñ ke dimāġhoñ ko sharar-bār banā.e
kursī ke liye maut ke kirdār banā.e
marne ke liye itemi hathiyār banā.e
goloñ se bharā ek bhī sandūq nahīñ hai
hāthoñ meñ gad.hoñ ke koī bandūq nahīñ hai
ālāt-e-jadal aap ne ījād kiye haiñ
paidā bhī na.e tarz ke jallād kiye haiñ
kuchh jel se qazzāq bhī āzād kiye haiñ
vīrān makāñ shahr bhī barbād kiye haiñ
paañv kisī leader kā na deñge gad.he jamne
jis roz siyāsat meñ qadam rakh diyā ham ne
jo rahbar-e-aqwam se mausum gadhe hain
kam-baKHt wo paidaeshi mazlum gadhe hain
aasaish-o-aram se mahrum gadhe hain
public ki tarah jitne bhi masum gadhe hain
izzat hai gadhon ki na Thikana hai gadhon ka
leader yahi kahta hai zamana hai gadhon ka
fitrat sag-e-KHun-KHwar ki insan mein aai
ghairon se mohabbat hai to apno se laDai
KHu-e-KHar-e-mazlum bashar ne nahin pai
karta hai musalman ki musalman piTai
muslim ki tarah koi bhi nadan nahin hai
sad-shukr ki KHar ek bhi musalman nahin hai
hum ghas ka shikwa na talab dal karenge
aawaz mein paida naya sur-tal karenge
mil-jul ke gadhe zulm ko pamal karenge
insan ki baqa ke liye haDtal karenge
ai rahbaro chain se jine nahin denge
insan ka lahu aap ko pine nahin denge
leader hai wo ghunDon ko jo sardar banae
insan ke dimaghon ko sharar-bar banae
kursi ke liye maut ke kirdar banae
marne ke liye itemi hathiyar banae
golon se bhara ek bhi sanduq nahin hai
hathon mein gadhon ke koi banduq nahin hai
aalat-e-jadal aap ne ijad kiye hain
paida bhi nae tarz ke jallad kiye hain
kuchh jel se qazzaq bhi aazad kiye hain
viran makan shahr bhi barbaad kiye hain
panw kisi leader ka na denge gadhe jamne
jis roz siyasat mein qadam rakh diya hum ne
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.