qimti kitab

ek din biivī ne farmāyā tumhārī har kitāb

fāltū sāmān hai kuuḌā hai raddī hai janāb

āj-kal mahñgā.ī se maiñ kis qadar bad-hāl huuñ

tum ijāzat do agar raddī meñ in ko biich duuñ

dafn in meñ ilm-o-fan ke haiñ hazāroñ māhtāb

maiñ ne biivī se kahā nāyāb hai har ik kitāb

dekh ye dīvān-e-ġhālib aap hai apnī misāl

is kā ik ik sher hai urdu adab meñ lā-zavāl

dekh 'hālī' kī musaddas kā nahīñ koī javāb

ye bhī hai urdu adab meñ ek bā-maqsad kitāb

aur ye bāñg-e-darā 'iqbāl' kī pahchān hai

kyā ḳhabar tujh ko ye urdu shā.irī kī shaan hai

inqilābī ishqīya nazmoñ kī kulliyāt hai

'josh' kī urdu adab ko qīmtī sauġhāt hai

aur ye hai 'talḳhiyāñ' 'sāhir' kā lā-fānī kalām

us se hī zinda rahegā hashr tak 'sāhir' kā naam

ye ikaa.ī aur aamad haiñ kitābeñ 'badr' kī

nāqidoñ ne in kitāboñ se hī un kī qadr kī

aag kā dariyā hai ye ye 'gardish-e-rañg-e-chaman'

in kutub se hai ayaañ urdu adab kā bāñkpan

umr bhar kī hai kamā.ī besh-o-kam 'shahbāz' kī

dekh ye haiñ chhe kitābeñ mohtaram 'shahbāz' kī

dekh ye 'fārūq' bhaa.ī kī kitābeñ be-shumār

nasr bhī hai mustanad aur nazm bhī hai bā-vaqār

dekh tālib kī kitābeñ pahlā patthar silsila

lafz-e-sāda meñ chhupā hai zindagī kā falsafa

ek din biwi ne farmaya tumhaari har kitab

faltu saman hai kuDa hai raddi hai janab

aaj-kal mahngai se main kis qadar bad-haal hun

tum ijazat do agar raddi mein in ko bich dun

dafn in mein ilm-o-fan ke hain hazaron mahtab

main ne biwi se kaha nayab hai har ek kitab

dekh ye diwan-e-ghaalib aap hai apni misal

is ka ek ek sher hai urdu adab mein la-zawal

dekh 'haali' ki musaddas ka nahin koi jawab

ye bhi hai urdu adab mein ek ba-maqsad kitab

aur ye bang-e-dara 'iqbaal' ki pahchan hai

kya KHabar tujh ko ye urdu shairi ki shan hai

inqilabi ishqiya nazmon ki kulliyat hai

'josh' ki urdu adab ko qimti saughat hai

aur ye hai 'talKHiyan' 'sahir' ka la-fani kalam

us se hi zinda rahega hashr tak 'sahir' ka nam

ye ikai aur aamad hain kitaben 'badr' ki

naqidon ne in kitabon se hi un ki qadr ki

aag ka dariya hai ye ye 'gardish-e-rang-e-chaman'

in kutub se hai ayan urdu adab ka bankpan

umr bhar ki hai kamai besh-o-kam 'shahbaz' ki

dekh ye hain chhe kitaben mohtaram 'shahbaz' ki

dekh ye 'faruq' bhai ki kitaben be-shumar

nasr bhi hai mustanad aur nazm bhi hai ba-waqar

dekh talib ki kitaben pahla patthar silsila

lafz-e-sada mein chhupa hai zindagi ka falsafa