saqi-nama

purānī 'azmat o shaukat se ḳhālī jaam hai saaqī

har ik koshish hamārī ab barā.e-nām hai saaqī

vo derīna shujā'at kī kahāñ bū-bās hai ham haiñ

faqat īrānī tūrānī va Tīm-o-Tām hai saaqī

kabhī manzil pe manzil tai kiyā karte the himmat se

magar ab dil ke engine kā hī chakkā jaam hai saaqī

faqīr-e-rāh ko baḳhshe ga.e asrār-e-sultānī

magar sultāna Daaku hai koī bahrām hai saaqī

na uTThā phir koī ġhāzī hamāre lāla-zāroñ se

ki in meñ buzdilī kā zikr sub.h-o-shām hai saaqī

bajā.e nā’ra-e-allāhu-akbar ke jidhar dekho

zabāñ sākit hai aur dil meñ machā kohrām hai saaqī

jahāñ se ibtidā kī thī bahut nīche chale aa.e

'ajab āġhāz thā apnā 'ajab anjām hai saaqī

maiñ shā'ir huuñ mujhe piine se nafrat ho nahīñ saktī

ki ye to pairvī-e-sunnat-e-ḳhayyām hai saaqī

bahut māyūs hai 'asrār' apne rahnumāoñ se

ki ab millat-faroshī hī bas un kā kaam hai saaqī

purani 'azmat o shaukat se KHali jam hai saqi

har ek koshish hamari ab barae-nam hai saqi

wo derina shuja'at ki kahan bu-bas hai hum hain

faqat irani turani wa Tim-o-Tam hai saqi

kabhi manzil pe manzil tai kiya karte the himmat se

magar ab dil ke engine ka hi chakka jam hai saqi

faqir-e-rah ko baKHshe gae asrar-e-sultani

magar sultana Daku hai koi bahram hai saqi

na uTTha phir koi ghazi hamare lala-zaron se

ki in mein buzdili ka zikr subh-o-sham hai saqi

bajae na’ra-e-allahu-akbar ke jidhar dekho

zaban sakit hai aur dil mein macha kohram hai saqi

jahan se ibtida ki thi bahut niche chale aae

'ajab aaghaz tha apna 'ajab anjam hai saqi

main sha'ir hun mujhe pine se nafrat ho nahin sakti

ki ye to pairwi-e-sunnat-e-KHayyam hai saqi

bahut mayus hai 'asrar' apne rahnumaon se

ki ab millat-faroshi hi bas un ka kaam hai saqi