sag-e-laila

ik roz cantēn meñ baiThā thā dil-hazīñ

kutte pe haath phertī thī ek mah-jabīñ

thuthan se muñh milātī thī lab chāTtā thā vo

āshiq-mizāj jo the unheñ kāTtā thā vo

maiñ ne kahā ki mujh pe karam koī iltifāt

kahne lagī ki jā.iye kiije na mujh se baat

kutte kā aisā pyaar vahī shaḳhs pā.egā

har dam mire huzūr meñ jo dum hilā.e gā

maiñ ne kahā ki fitrat-e-chañgez rakhtā huuñ

sūrat se rang-o-rūp se añgrez lagtā huuñ

phir kyuuñ mire ḳhilāf batā terī hai nazar

har chiiz kutte jaisī hai bas dum kī hai kasar

aatā hai mujh ko yaar ke qadmoñ pe loTnā

shām-o-sahar paḌos ke kuttoñ pe bhauñknā

is ko bhī maiñ samajhtā huuñ saubhāg kahte haiñ

mahvash mujhe hamesha se bulldog kahte haiñ

ab aap hī batā.eñ vo kaise nibhā.egā

jis ko nasīb dum nahīñ vo kyā hilā.e gā

maiñ ḳhuub jāntī huuñ ki rusvā karoge tum

mahfil meñ mere pyaar kā charchā karoge tum

ifshā-e-rāz-e-ishq kā ḳhatra hai dil-nashīñ

kitnā vafā-shanās hai aur boltā nahīñ

be-dum kā huuñ zarūr magar kuchh na kahūñgā

dum-dār kī tarah hī se ḳhāmosh rahūñgā

mar jā.ūñgā na is tarah inkār kījiye

pichhḌā huā samajh ke hī ik pyaar kījiye

kutte taraqqī kar ke agar wolf ho.eñge

kuchh din ke ba.ad dekhnā ham-zulf ho.eñge

bolī ki sīdhī hogī nahīñ aadmī kī dum

solah baras kī laḌkī se shādī karoge tum

āḳhir ko maiñ ne charb-zabānī se haar kar

ye kah diyā ki Thiik hai kutte se pyaar kar

ek roz canteen mein baiTha tha dil-hazin

kutte pe hath pherti thi ek mah-jabin

thuthan se munh milati thi lab chaTta tha wo

aashiq-mizaj jo the unhen kaTta tha wo

main ne kaha ki mujh pe karam koi iltifat

kahne lagi ki jaiye kije na mujh se baat

kutte ka aisa pyar wahi shaKHs paega

har dam mere huzur mein jo dum hilae ga

main ne kaha ki fitrat-e-changez rakhta hun

surat se rang-o-rup se angrez lagta hun

phir kyun mere KHilaf bata teri hai nazar

har chiz kutte jaisi hai bas dum ki hai kasar

aata hai mujh ko yar ke qadmon pe loTna

sham-o-sahar paDos ke kutton pe bhaunkna

is ko bhi main samajhta hun saubhag kahte hain

mahwash mujhe hamesha se bulldog kahte hain

ab aap hi bataen wo kaise nibhaega

jis ko nasib dum nahin wo kya hilae ga

main KHub jaanti hun ki ruswa karoge tum

mahfil mein mere pyar ka charcha karoge tum

ifsha-e-raaz-e-ishq ka KHatra hai dil-nashin

kitna wafa-shanas hai aur bolta nahin

be-dum ka hun zarur magar kuchh na kahunga

dum-dar ki tarah hi se KHamosh rahunga

mar jaunga na is tarah inkar kijiye

pichhDa hua samajh ke hi ek pyar kijiye

kutte taraqqi kar ke agar wolf hoenge

kuchh din ke baad dekhna ham-zulf hoenge

boli ki sidhi hogi nahin aadmi ki dum

solah baras ki laDki se shadi karoge tum

aaKHir ko main ne charb-zabani se haar kar

ye kah diya ki Thik hai kutte se pyar kar