suna hai usko bahut se uchakke dekhte hain

sunā hai us ko bahut se uchakke dekhte haiñ

so ham bhī dāman-e-taqvā jhaTak ke dekhte haiñ

sunā hai vo to bhaḌaktā hai baat karne se

so pyaar us pe zarā sā chhiḌak ke dekhte haiñ

nazar meñ us kī khaTakte haiñ chāhne vaale

so us kī āñkhoñ meñ ham bhī khaTak ke dekhte haiñ

sunā hai auj-e-surayyā pe hai dimāġh us kā

so aaj hausle ham bhī falak ke dekhte haiñ

koī to baat hai us kī ġhazālī āñkhoñ meñ

ġhazāl-e-dasht jabhī to ThiThak ke dekhte haiñ

sunā hai vo to qayāmat kī chaal chaltā hai

to aao chalte haiñ us ko lapak ke dekhte haiñ

vo jab bhī jhuum ke chaltā hai us ke paikar se

vo mauj uThtī hai sāġhar chhalak ke dekhte haiñ

sunā hai vo to sabhī mausamoñ kī malika hai

so us se rang milā ke dhanak ke dekhte haiñ

sunā hai bhūl-bhulayyāñ haiñ us kī qurbat meñ

so jān-būjh ke ham bhī bhaTak ke dekhte haiñ

sunā hai mood meñ baara baje vo aatā hai

so us ke mood se pahle khisak ke dekhte haiñ

vo god letā hai yā god meñ vo letā hai

so us ke sāmne ham bhī humak ke dekhte haiñ

sunā hai us kī to āñkheñ bhī baat kartī haiñ

so be-jhijak bhī use kuchh jhijak ke dekhte haiñ

sunā hai us ko hamārā ḳhayāl rahtā hai

so ham ḳhayāl kā dāman jhaTak ke dekhte haiñ

ye baat raaz kī hai raaz hī meñ rahne deñ

ki vo jhijaktā hai yā ham jhijak ke dekhte haiñ

sunā hai husn-e-takallum pe naaz hai us ko

so us ke lahje meñ ham bhī lahak ke dekhte haiñ

ulaT palaT ke use dekhnā to mushkil hai

so aaj peḌ se ulTā laTak ke dekhte haiñ

'farāz' tak to pahuñchne meñ vaqt lagtā hai

to phir nasheb kī jānib luḌhak ke dekhte haiñ

suna hai us ko bahut se uchakke dekhte hain

so hum bhi daman-e-taqwa jhaTak ke dekhte hain

suna hai wo to bhaDakta hai baat karne se

so pyar us pe zara sa chhiDak ke dekhte hain

nazar mein us ki khaTakte hain chahne wale

so us ki aankhon mein hum bhi khaTak ke dekhte hain

suna hai auj-e-surayya pe hai dimagh us ka

so aaj hausle hum bhi falak ke dekhte hain

koi to baat hai us ki ghazali aankhon mein

ghazal-e-dasht jabhi to ThiThak ke dekhte hain

suna hai wo to qayamat ki chaal chalta hai

to aao chalte hain us ko lapak ke dekhte hain

wo jab bhi jhum ke chalta hai us ke paikar se

wo mauj uThti hai saghar chhalak ke dekhte hain

suna hai wo to sabhi mausamon ki malika hai

so us se rang mila ke dhanak ke dekhte hain

suna hai bhul-bhulayyan hain us ki qurbat mein

so jaan-bujh ke hum bhi bhaTak ke dekhte hain

suna hai mood mein bara baje wo aata hai

so us ke mood se pahle khisak ke dekhte hain

wo god leta hai ya god mein wo leta hai

so us ke samne hum bhi humak ke dekhte hain

suna hai us ki to aankhen bhi baat karti hain

so be-jhijak bhi use kuchh jhijak ke dekhte hain

suna hai us ko hamara KHayal rahta hai

so hum KHayal ka daman jhaTak ke dekhte hain

ye baat raaz ki hai raaz hi mein rahne den

ki wo jhijakta hai ya hum jhijak ke dekhte hain

suna hai husn-e-takallum pe naz hai us ko

so us ke lahje mein hum bhi lahak ke dekhte hain

ulaT palaT ke use dekhna to mushkil hai

so aaj peD se ulTa laTak ke dekhte hain

'faraaz' tak to pahunchne mein waqt lagta hai

to phir nasheb ki jaanib luDhak ke dekhte hain