tajrabaat-e-talKH ne har-chand samjhaya mujhe

tajrbāt-e-talḳh ne har-chand samjhāyā mujhe

dil magar dil thā usī mahfil meñ le aayā mujhe

husn har shai par tavajjoh kī nazar kā naam hai

bār-hā kāñToñ kī rānā.ī ne chauñkāyā mujhe

duur tak dāmān-e-hastī par diye jalte ga.e

der tak umr-e-guzishta kā ḳhayāl aayā mujhe

har nazar bas apnī apnī raushnī tak jā sakī

har kisī ne apne apne zarf tak paayā mujhe

har ravāñ lamha baḌī tafsīl se miltā gayā

har guzarte rañg ne ḳhud ruk ke Thahrāyā mujhe

ġhuncha-o-gul mahr o mah abr o havā ruḳhsār o lab

zindagī ne har qadam par yaad farmāyā mujhe

tajrbaat-e-talKH ne har-chand samjhaya mujhe

dil magar dil tha usi mahfil mein le aaya mujhe

husn har shai par tawajjoh ki nazar ka nam hai

bar-ha kanTon ki ranai ne chaunkaya mujhe

dur tak daman-e-hasti par diye jalte gae

der tak umr-e-guzishta ka KHayal aaya mujhe

har nazar bas apni apni raushni tak ja saki

har kisi ne apne apne zarf tak paya mujhe

har rawan lamha baDi tafsil se milta gaya

har guzarte rang ne KHud ruk ke Thahraya mujhe

ghuncha-o-gul mahr o mah abr o hawa ruKHsar o lab

zindagi ne har qadam par yaad farmaya mujhe