zarurat-e-rishta

hamāre laal ko darkār hai vahī laḌkī

ki jis kā baap police meñ ho kam se kam deputy

jo puurī kar sake hasrat hamāre beTe kī

papīhā pyaar kā kahnā hai har ghaḌī pī-pī

sharāb o raqs se raġhbat juue kī aadat hai

ye ġhunda-gardī nahīñ ḳhāndānī shaukat hai

kamar ḳhamīda hai itnī ki miim lagtā hai

vo āshiqoñ kī mohabbat meñ team lagtā hai

vo ahmaqoñ kī sabhā meñ fahīm lagtā hai

ḳhudā ke fazl se aadhā yatīm lagtā hai

mizāj-e-yār laḌakpan se āshiqāna hai

ḳhudā kā shukr hai andhā nahīñ hai kaanā hai

nahār-muñh ka.ī filmoñ ke naam letā hai

phir is ke ba.ad kaleje ko thaam letā hai

club meñ jā ke mohabbat ke jaam letā hai

vo maarā aql kā kab is se kaam letā hai

kare hai sāmnā DaT kar hazār ḳhatroñ kā

vo sarġhana hai mohalle ke jeb-katroñ kā

budhū ke vāste pāThak ke ghar bhī jaatā hai

qarol-bāġh ke chakkar bhī vo lagātā hai

jahāñ bhī jaatā hai māyūs luuT aatā hai

marīz-e-ishq hai sote meñ baḌbaḌātā hai

ilaaj kar liye sab desī o bidesī ke

hakīm thak ga.e tāqat ke pharmacy ke

ye us kī āḳhirī ḳhvāhish hai jo ki puurī ho

vo dasvīñ fail hai laḌkī magar p.hd ho

frij ho fan ho motor ho aur T.v ho

chalegī laḌkī vo puurī ho yā adhūrī ho

hazār fāqoñ meñ zaa.il na tandurustī ho

ye shart bhī hai zarūrī ki laal jantī ho

dulhan jo dil kī faqat dil se baat kahtī hai

vafāt-e-jazba-e-dil ko hayāt kahtī ho

patī ke zulm-o-sitam ko najāt kahtī ho

agar vo din ko kahe raat raat kahtī ho

fasāna pyaar kī bātoñ ko vo banā Daale

ḳhamoshī shart hai chāhe patī jalā Daale

hamare lal ko darkar hai wahi laDki

ki jis ka bap police mein ho kam se kam deputy

jo puri kar sake hasrat hamare beTe ki

papiha pyar ka kahna hai har ghaDi pi-pi

sharab o raqs se raghbat jue ki aadat hai

ye ghunda-gardi nahin KHandani shaukat hai

kamar KHamida hai itni ki mim lagta hai

wo aashiqon ki mohabbat mein team lagta hai

wo ahmaqon ki sabha mein fahim lagta hai

KHuda ke fazl se aadha yatim lagta hai

mizaj-e-yar laDakpan se aashiqana hai

KHuda ka shukr hai andha nahin hai kana hai

nahaar-munh kai filmon ke nam leta hai

phir is ke baad kaleje ko tham leta hai

club mein ja ke mohabbat ke jam leta hai

wo mara aql ka kab is se kaam leta hai

kare hai samna DaT kar hazar KHatron ka

wo sarghana hai mohalle ke jeb-katron ka

budhu ke waste paThak ke ghar bhi jata hai

qarol-bagh ke chakkar bhi wo lagata hai

jahan bhi jata hai mayus luT aata hai

mariz-e-ishq hai sote mein baDbaData hai

ilaj kar liye sab desi o bidesi ke

hakim thak gae taqat ke pharmacy ke

ye us ki aaKHiri KHwahish hai jo ki puri ho

wo daswin fail hai laDki magar phd ho

frij ho fan ho motor ho aur Tw ho

chalegi laDki wo puri ho ya adhuri ho

hazar faqon mein zail na tandurusti ho

ye shart bhi hai zaruri ki lal janti ho

dulhan jo dil ki faqat dil se baat kahti hai

wafat-e-jazba-e-dil ko hayat kahti ho

pati ke zulm-o-sitam ko najat kahti ho

agar wo din ko kahe raat raat kahti ho

fasana pyar ki baaton ko wo bana Dale

KHamoshi shart hai chahe pati jala Dale