aae ho ghar se uTh kar mere makan ke upar

aa.e ho ghar se uTh kar mere makāñ ke uupar

kī tum ne mehrbānī be-ḳhānumāñ ke uupar

phūloñ se uTh nigāheñ mukhḌe pe us ke Thahrīñ

vo gul-farosh kā jo aaya dukāñ ke uupar

barsāt ab ke guzrī ḳhauf-o-ḳhatar meñ saarī

chashmak-zanāñ rahī hai barq āshiyāñ ke uupar

ruḳhsār sā kisū ke kaahe ko hai farozāñ

har chand māh-e-tābāñ hai āsmāñ ke uupar

be-sudh paḌā rahūñ huuñ bistar pe rāt-din maiñ

kyā aafat aa ga.ī hai is nīm-jāñ ke uupar

ishq-o-havas meñ kuchh to āḳhir tamīz hogī

aa.ī tabī.at us kī gar imtihāñ ke uupar

ulfat kī kulfatoñ meñ ma.alūm hai huī vo

thā e'timād-e-kullī tāb-o-tavāñ ke uupar

mahv-e-duā thā aksar ġhairat se lek gaahe

aaya na naam us kā merī zabāñ ke uupar

vo jān-o-dil kī ḳhvāhish aaya nahīñ jahāñ meñ

aa.ī hai ik qayāmat ahl-e-jahāñ ke uupar

kyā log haiñ mohibbāñ saudā-e-āshiqī meñ

aġhmāz karte haiñ sab jī ke ziyāñ ke uupar

hairat se us ke rū kī chup lag ga.ī hai aisī

goyā ki muhr kī hai mere dahāñ ke uupar

jo rāh-e-dostī meñ ai 'mīr' mar ga.e haiñ

sar deñge log un ke pā ke nishāñ ke uupar

aae ho ghar se uTh kar mere makan ke upar

ki tum ne mehrbani be-KHanuman ke upar

phulon se uTh nigahen mukhDe pe us ke Thahrin

wo gul-farosh ka jo aaya dukan ke upar

barsat ab ke guzri KHauf-o-KHatar mein sari

chashmak-zanan rahi hai barq aashiyan ke upar

ruKHsar sa kisu ke kahe ko hai farozan

har chand mah-e-taban hai aasman ke upar

be-sudh paDa rahun hun bistar pe raat-din main

kya aafat aa gai hai is nim-jaan ke upar

ishq-o-hawas mein kuchh to aaKHir tamiz hogi

aai tabiat us ki gar imtihan ke upar

ulfat ki kulfaton mein malum hai hui wo

tha e'timad-e-kulli tab-o-tawan ke upar

mahw-e-dua tha aksar ghairat se lek gahe

aaya na nam us ka meri zaban ke upar

wo jaan-o-dil ki KHwahish aaya nahin jahan mein

aai hai ek qayamat ahl-e-jahan ke upar

kya log hain mohibban sauda-e-ashiqi mein

aghmaz karte hain sab ji ke ziyan ke upar

hairat se us ke ru ki chup lag gai hai aisi

goya ki muhr ki hai mere dahan ke upar

jo rah-e-dosti mein ai 'mir' mar gae hain

sar denge log un ke pa ke nishan ke upar