aalam mein koi dil ka talabgar na paya

aalam meñ koī dil kā talabgār na paayā

is jins kā yaañ ham ne ḳharīdār na paayā

haq DhūñDne kā aap ko aatā nahīñ varna

aalam hai sabhī yaar kahāñ yaar na paayā

ġhairoñ hī ke hāthoñ meñ rahe dast-e-nigārīñ

kab ham ne tire haath se āzār na paayā

jaatī hai nazar ḳhas pe gah chashm-parīdan

yaañ ham ne par kaah bhī be-kār na paayā

tasvīr ke mānind lage dar hī se guzrī

majlis meñ tirī ham ne kabhū baar na paayā

sūrāḳh hai siine meñ har ik shaḳhs ke tujh se

kis dal ke tarah tīr-e-nigah paar na paayā

marbūt haiñ tujh se bhī yahī nā-kas-o-nā-ahl

us baaġh meñ ham ne gul be-ḳhār na paayā

dam ba.ad junūñ mujh meñ na mahsūs thā ya.anī

jaame meñ mire yāroñ ne ik taar na paayā

ā.īna bhī hairat se mohabbat kī hue ham

par sair ho is shaḳhs kā dīdār na paayā

vo khīñch ke shamshīr sitam rah gayā jo 'mīr'

ḳhūñ-rezī kā yaañ koī sazā-vār na paayā

aalam mein koi dil ka talabgar na paya

is jins ka yan hum ne KHaridar na paya

haq DhunDne ka aap ko aata nahin warna

aalam hai sabhi yar kahan yar na paya

ghairon hi ke hathon mein rahe dast-e-nigarin

kab hum ne tere hath se aazar na paya

jati hai nazar KHas pe gah chashm-paridan

yan hum ne par kah bhi be-kar na paya

taswir ke manind lage dar hi se guzri

majlis mein teri hum ne kabhu bar na paya

suraKH hai sine mein har ek shaKHs ke tujh se

kis dal ke tarah tir-e-nigah par na paya

marbut hain tujh se bhi yahi na-kas-o-na-ahl

us bagh mein hum ne gul be-KHar na paya

dam baad junun mujh mein na mahsus tha yani

jame mein mere yaron ne ek tar na paya

aaina bhi hairat se mohabbat ki hue hum

par sair ho is shaKHs ka didar na paya

wo khinch ke shamshir sitam rah gaya jo 'mir'

KHun-rezi ka yan koi saza-war na paya