aankhen jo hon to ain hai maqsud har jagah

āñkheñ jo hoñ to ain hai maqsūd har jagah

bizzāt hai jahāñ meñ vo maujūd har jagah

vāqif ho shān-e-bandagī se qaid-e-qibla kyā

sar har kahīñ jhukā ki hai masjūd har jagah

mū tan pe ham na soḳhta-jānoñ ke haiñ numūd

hai sozish-e-darūñ se barūñ duud har jagah

dillī ke lakhna.ū ke ḳhush-andām ḳhuub lek

rāh-e-vafā-o-mehr hai masdūd har jagah

phirtī hai apne saath lagī muttasil fanā

āb-e-ravāñ se ham hue nābūd har jagah

shohrā rakhe hai terī ḳhariyyat jahāñ meñ shaiḳh

majlis ho yā ki dasht uchhal-kūd har jagah

saudā-e-āshiqī meñ to jī kā ziyān hai

phirte haiñ 'mīr' DhūñDte hī suud har jagah

aankhen jo hon to ain hai maqsud har jagah

bizzat hai jahan mein wo maujud har jagah

waqif ho shan-e-bandagi se qaid-e-qibla kya

sar har kahin jhuka ki hai masjud har jagah

mu tan pe hum na soKHta-jaanon ke hain numud

hai sozish-e-darun se barun dud har jagah

dilli ke lakhnau ke KHush-andam KHub lek

rah-e-wafa-o-mehr hai masdud har jagah

phirti hai apne sath lagi muttasil fana

aab-e-rawan se hum hue nabud har jagah

shohra rakhe hai teri KHariyyat jahan mein shaiKH

majlis ho ya ki dasht uchhal-kud har jagah

sauda-e-ashiqi mein to ji ka ziyan hai

phirte hain 'mir' DhunDte hi sud har jagah