aashiq ho to apne tain diwana sab mein jate raho

'āshiq ho to apne ta.iiñ dīvāna sab meñ jaate raho

chakkar maaro jaise bagūlā ḳhaak uḌāte aate raho

dostī jis ko log kaheñ haiñ jaan se us ko ḳhusūmat hai

ho jaave jo tum ko kisī se tā-maqdūr chhupāte raho

dil lagne kī choT burī hai is sadme se ḳhudā-hāfiz

baare sa’i-o-kashish koshish se jī ko apne bachāte raho

aa.ī bahār junūñ ho mubārak 'ishqallāh hamāre liye

naa'l jaḌe sīnoñ pe phiro tum daaġh saroñ pe jalāte raho

shā'ir ho mat chupke raho ab chup meñ jāneñ jaatī haiñ

baat karo abyāt paḌho kuchh baiteñ ham ko batāte raho

abr-e-siyah qible se aayā tum bhī sheḳho paas karo

taḳhfīfe Tuk laT-paTe bāñdho sāḳhta hī madh-māte raho

kyā jaane vo maa.il hove kab milne kā tum se 'mīr'

qibla-o-kā’ba us kī jānib aksar aate jaate raho

'ashiq ho to apne tain diwana sab mein jate raho

chakkar maro jaise bagula KHak uDate aate raho

dosti jis ko log kahen hain jaan se us ko KHusumat hai

ho jawe jo tum ko kisi se ta-maqdur chhupate raho

dil lagne ki choT buri hai is sadme se KHuda-hafiz

bare sa’i-o-kashish koshish se ji ko apne bachate raho

aai bahaar junun ho mubarak 'ishqallah hamare liye

na'l jaDe sinon pe phiro tum dagh saron pe jalate raho

sha'ir ho mat chupke raho ab chup mein jaanen jati hain

baat karo abyat paDho kuchh baiten hum ko batate raho

abr-e-siyah qible se aaya tum bhi sheKHo pas karo

taKHfife Tuk laT-paTe bandho saKHta hi madh-mate raho

kya jaane wo mail howe kab milne ka tum se 'mir'

qibla-o-ka’ba us ki jaanib aksar aate jate raho