aatish ke shoale sar se hamare guzar gae

ātish ke sho.ale sar se hamāre guzar ga.e

bas ai tab-e-firāq ki garmī meñ mar ga.e

manzil na kar jahāñ ko ki ham ne safar se aah

jin kā kiyā surāġh sunā ve guzar ga.e

musht-e-namak se bhī to kabhū yaad kar hameñ

ab daaġh khāte khāte falak jī to bhar ga.e

nāseh na roveñ kyūñke mohabbat ke jī ko ham

ai ḳhānumāñ-ḳharāb hamāre to ghar ga.e

talvār aap khīñchiye hāzir hai yaañ bhī sar

bas āshiqī kī ham ne jo marne se Dar ga.e

kar deñge āsmān-o-zamīñ ek hashr ko

is ma.arke meñ yaar jī ham bhī agar ga.e

qaaf

ye rāh-o-rasm-e-dil-shudagāñ guftanī nahīñ

jaane de 'mīr' sāhib-o-qibla jidhar ga.e

roz-e-vidā.a us kī galī tak the ham bhī saath

jab dardmand ham ko ve mā'lūm kar ga.e

kar yak nigāh yaas kī Tap de se ro diyā

phir ham idhar ko aa.e miyāñ ve udhar ga.e

aatish ke shoale sar se hamare guzar gae

bas ai tab-e-firaq ki garmi mein mar gae

manzil na kar jahan ko ki hum ne safar se aah

jin ka kiya suragh suna we guzar gae

musht-e-namak se bhi to kabhu yaad kar hamein

ab dagh khate khate falak ji to bhar gae

naseh na rowen kyunke mohabbat ke ji ko hum

ai KHanuman-KHarab hamare to ghar gae

talwar aap khinchiye hazir hai yan bhi sar

bas aashiqi ki hum ne jo marne se Dar gae

kar denge aasman-o-zamin ek hashr ko

is marke mein yar ji hum bhi agar gae

qaf

ye rah-o-rasm-e-dil-shudagan guftani nahin

jaane de 'mir' sahib-o-qibla jidhar gae

roz-e-widaa us ki gali tak the hum bhi sath

jab dardmand hum ko we ma'lum kar gae

kar yak nigah yas ki Tap de se ro diya

phir hum idhar ko aae miyan we udhar gae