ab dil KHizan mein rahta hai ji ki rukan ke sath

ab dil ḳhizāñ meñ rahtā hai jī kī rukan ke saath

jaanā hī thā hameñ bhī bahār-e-chaman ke saath

kab tak ḳharāb shahr meñ us ke phirā kareñ

ab jāveñ yaañ se koī ġharīb-ul-vatan ke saath

ham baaġh se ḳhizāñ meñ ga.e par hazār-haif

jaanā banā na apnā gul-o-yāsman ke saath

luknat se kyā nikaltī nahīñ us ke muñh se baat

chipkā hai harf yaar ke shīrīñ dahan ke saath

jī ḳhvāb-e-marg le ga.e hasrat hī meñ nidān

ik shab na so.e ham kisū gul pairahan ke saath

jī phaT gayā hai rashk se chaspāñ libās ke

kyā tang jaama lipTā hai us ke badan ke saath

kyā jāneñ log ishq kā rāz-o-niyāz 'mīr'

ik baat us se ho ga.ī do-do bachan ke saath

ab dil KHizan mein rahta hai ji ki rukan ke sath

jaana hi tha hamein bhi bahaar-e-chaman ke sath

kab tak KHarab shahr mein us ke phira karen

ab jawen yan se koi gharib-ul-watan ke sath

hum bagh se KHizan mein gae par hazar-haif

jaana bana na apna gul-o-yasman ke sath

luknat se kya nikalti nahin us ke munh se baat

chipka hai harf yar ke shirin dahan ke sath

ji KHwab-e-marg le gae hasrat hi mein nidan

ek shab na soe hum kisu gul pairahan ke sath

ji phaT gaya hai rashk se chaspan libas ke

kya tang jama lipTa hai us ke badan ke sath

kya jaanen log ishq ka raaz-o-niyaz 'mir'

ek baat us se ho gai do-do bachan ke sath