ab ke hazar-rang gulistan mein aae gul

ab ke hazār-rang gulistāñ meñ aa.e gul

par us baġhair apne to jī ko na bhaa.e gul

bulbul ko naaz kyoñ na ḳhiyābān-e-gul pe ho

kyā jaane jin ne chhātī pe bhar kar na khaa.e gul

kab tak hinā.ī paañv bin us ke ye bekalī

lag jaa.e Tuk chaman meñ kahīñ aañkh pā-e-gul

nā-chār ho chaman meñ na rahiye kahūñ huuñ jab

bulbul kahe hai aur koī din barā-e-gul

chaliye baġhal meñ le ke gulābī kisū taraf

dāmān-e-dil ko khīñche hai saaqī havā-e-gul

pagḌī meñ phuul rakhte haiñ rā’nā javān-e-shahr

dāġh-e-junūñ hī sar pe rahā yaañ bajā-e-gul

bulbul ko kyā sune koī uḌ jaate haiñ havās

jab dardmand kahtī hai dam bhar ke haa.e gul

soyā na vo badan kī nazākat se saarī raat

bistar pe us ke ḳhvāb ke kin ne bichhā.e gul

masrūf-e-yār chāhiye murġh-e-chaman sā ho

dil nazr o diida pesh-kash o jaañ fidā-e-gul

ham tarh āshiyāñ kī na gulshan meñ Dālte

mā'lūm hotī aage jo ham ko vafā-e-gul

chaspāñ libās hote haiñ lekin na is qadar

hai chaak rashk-e-jāma se us ke qabā-e-gul

kyā samjhe lutf chehroñ ke rang-o-bahār kā

bulbul ne aur kuchh nahīñ dekhā sivā-e-gul

thā vasf un laboñ kā zabān-e-qalam pe 'mīr'

yā muñh meñ ‘andalīb ke the barg-hā-e-gul

ab ke hazar-rang gulistan mein aae gul

par us baghair apne to ji ko na bhae gul

bulbul ko naz kyon na KHiyaban-e-gul pe ho

kya jaane jin ne chhati pe bhar kar na khae gul

kab tak hinai panw bin us ke ye bekali

lag jae Tuk chaman mein kahin aankh pa-e-gul

na-chaar ho chaman mein na rahiye kahun hun jab

bulbul kahe hai aur koi din bara-e-gul

chaliye baghal mein le ke gulabi kisu taraf

daman-e-dil ko khinche hai saqi hawa-e-gul

pagDi mein phul rakhte hain ra’na jawan-e-shahr

dagh-e-junun hi sar pe raha yan baja-e-gul

bulbul ko kya sune koi uD jate hain hawas

jab dardmand kahti hai dam bhar ke hae gul

soya na wo badan ki nazakat se sari raat

bistar pe us ke KHwab ke kin ne bichhae gul

masruf-e-yar chahiye murgh-e-chaman sa ho

dil nazr o dida pesh-kash o jaan fida-e-gul

hum tarh aashiyan ki na gulshan mein Dalte

ma'lum hoti aage jo hum ko wafa-e-gul

chaspan libas hote hain lekin na is qadar

hai chaak rashk-e-jama se us ke qaba-e-gul

kya samjhe lutf chehron ke rang-o-bahaar ka

bulbul ne aur kuchh nahin dekha siwa-e-gul

tha wasf un labon ka zaban-e-qalam pe 'mir'

ya munh mein ‘andalib ke the barg-ha-e-gul