ai mujhse tujhko sau mile tujh sa na paya ek main

ai mujh se tujh ko sau mile tujh sā na paayā ek maiñ

sau sau kahīñ tū ne mujhe muñh par na laayā ek maiñ

aalam kī maiñ ne sair kī mujh ko jo ḳhush aaya so tū

sab se rahā mahzūz tū tujh ko na bhāyā ek maiñ

ye josh-e-ġham hote bhī haiñ yuuñ abr-e-tar rote bhī haiñ

chashm-e-jahāñ-āshob se dariyā bahāyā ek maiñ

thā sab ko da.avā ishq kā lekin na Thahrā koī bhī

dānista apnī jaan se dil ko uThāyā ek maiñ

haiñ tālib-e-sūrat sabhī mujh par sitam kyoñ is qadar

kyā mujrim-e-ishq-e-butāñ yaañ huuñ ḳhudāyā ek maiñ

bijlī se yuuñ chamke bahut par baat kahte ho chuke

juuñ abr saarī ḳhalq par huuñ ab to chhāyā ek maiñ

sau rang vo zāhir huā koī na jāgah se gayā

dil ko jo mere choT thī tāqat na laayā ek maiñ

is gulsitāñ se manfa.at yuuñ to hazāroñ ko huī

dekhā na sarv-o-gul kā yaañ Tuk sar pe saaya ek maiñ

rasm-e-kuhan hai dostī hotī bhī hai ulfat baham

maiñ kushtanī Thahrā jo huuñ kyā dil lagāyā ek maiñ

jin jin ne dekhā thā use be-ḳhud huā chetā bhī phir

par 'mīr' jiite jī ba-ḳhud hargiz na aaya ek maiñ

ai mujh se tujh ko sau mile tujh sa na paya ek main

sau sau kahin tu ne mujhe munh par na laya ek main

aalam ki main ne sair ki mujh ko jo KHush aaya so tu

sab se raha mahzuz tu tujh ko na bhaya ek main

ye josh-e-gham hote bhi hain yun abr-e-tar rote bhi hain

chashm-e-jahan-ashob se dariya bahaya ek main

tha sab ko dawa ishq ka lekin na Thahra koi bhi

danista apni jaan se dil ko uThaya ek main

hain talib-e-surat sabhi mujh par sitam kyon is qadar

kya mujrim-e-ishq-e-butan yan hun KHudaya ek main

bijli se yun chamke bahut par baat kahte ho chuke

jun abr sari KHalq par hun ab to chhaya ek main

sau rang wo zahir hua koi na jagah se gaya

dil ko jo mere choT thi taqat na laya ek main

is gulsitan se manfat yun to hazaron ko hui

dekha na sarw-o-gul ka yan Tuk sar pe saya ek main

rasm-e-kuhan hai dosti hoti bhi hai ulfat baham

main kushtani Thahra jo hun kya dil lagaya ek main

jin jin ne dekha tha use be-KHud hua cheta bhi phir

par 'mir' jite ji ba-KHud hargiz na aaya ek main