ai murgh-e-chaman subh hui zamzama sar kar

ai murġh-e-chaman sub.h huī zamzama sar kar

dam khīñch tah-e-dil se koī TukḌe jigar kar

vo ā.ina-rū baaġh ke phūloñ meñ jo dekhā

ham rah ga.e hairān usī muñh pe nazar kar

hai be-ḳhabarī mujh ko tire dekhe se saaqī

har lahza mirī jaan mujhe merī ḳhabar kar

jis jaa.e sarāpā meñ nazar jaatī hai us ke

aatā hai mire jī meñ yahīñ umr basar kar

farhād se patthar pe huiiñ san.ateñ kyā kyā

dil jā ke jigar-kāvī meñ kuchh tū bhī hunar kar

paḌte nigah us shoḳh kī hotā hai vo ahvāl

rah jaave hai jaise ki koī bijlī se Dar kar

māshūq kā kyā vasl vare aisā dharā hai

tā-sham.a patañgā bhī jo pahuñche hai to mar kar

yak shab taraf us chehra-e-tābāñ se huā thā

phir chāñd nazar hī na chaḌhā jī se utar kar

kasb aur kiyā hotā evaz reḳhte ke kaash

pachhtā.e bahut 'mīr' ham is kaam ko kar kar

ai murgh-e-chaman subh hui zamzama sar kar

dam khinch tah-e-dil se koi TukDe jigar kar

wo aaina-ru bagh ke phulon mein jo dekha

hum rah gae hairan usi munh pe nazar kar

hai be-KHabari mujh ko tere dekhe se saqi

har lahza meri jaan mujhe meri KHabar kar

jis jae sarapa mein nazar jati hai us ke

aata hai mere ji mein yahin umr basar kar

farhad se patthar pe huin sanaten kya kya

dil ja ke jigar-kawi mein kuchh tu bhi hunar kar

paDte nigah us shoKH ki hota hai wo ahwal

rah jawe hai jaise ki koi bijli se Dar kar

mashuq ka kya wasl ware aisa dhara hai

ta-shama patanga bhi jo pahunche hai to mar kar

yak shab taraf us chehra-e-taban se hua tha

phir chand nazar hi na chaDha ji se utar kar

kasb aur kiya hota ewaz reKHte ke kash

pachhtae bahut 'mir' hum is kaam ko kar kar