ai rashk-e-barq tujhse mushkil hai kar-e-ashiq

ai rashk-e-barq tujh se mushkil hai kār-e-āshiq

ik jhamke meñ kahāñ phir sabr-o-qarār-e-āshiq

ḳhāk-e-siyah se yaksāñ tere liye huā huuñ

tū bhī to ek shab ho sham.a-e-mazār-e-āshiq

ai bahr-e-husn hove ye aag sard Tuk tab

juuñ mauj ho labālab tujh se kanār-e-āshiq

dil-ḳhvāh koī dilbar miltā to dil ko dete

gar chāhne meñ hotā kuchh iḳhtiyār-e-āshiq

palkoñ kī us kī kāvish har dam jab aisī hove

mushkil ki jī se jaave phir ḳhār-ḳhār-e-āshiq

kyā jaane mahv jo ho apne hī rū-o-mū kā

guzre hai kis tarah se lail-o-nahār-e-āshiq

ḳhvārī kā mūjib apnī hai iztirāb har dam

dil samjhe to rahe bhī kuchh e.atibār-e-āshiq

āñkhoñ tale se sarke vo chashm-e-mast Tuk to

jaatā dikhā.ī deve ranj-o-ḳhumār-e-āshiq

kyā bojh bhārī se maiñ nākām kāTtā huuñ

duniyā se hai nirālā kuchh kārobār-e-āshiq

is parde meñ ġham-e-dil kahtā hai 'mīr' apnā

kyā sher-o-shā.erī hai yaaro shi.ār-e-āshiq

ai rashk-e-barq tujh se mushkil hai kar-e-ashiq

ek jhamke mein kahan phir sabr-o-qarar-e-ashiq

KHak-e-siyah se yaksan tere liye hua hun

tu bhi to ek shab ho shama-e-mazar-e-ashiq

ai bahr-e-husn howe ye aag sard Tuk tab

jun mauj ho labaalab tujh se kanar-e-ashiq

dil-KHwah koi dilbar milta to dil ko dete

gar chahne mein hota kuchh iKHtiyar-e-ashiq

palkon ki us ki kawish har dam jab aisi howe

mushkil ki ji se jawe phir KHar-KHar-e-ashiq

kya jaane mahw jo ho apne hi ru-o-mu ka

guzre hai kis tarah se lail-o-nahaar-e-ashiq

KHwari ka mujib apni hai iztirab har dam

dil samjhe to rahe bhi kuchh eatibar-e-ashiq

aankhon tale se sarke wo chashm-e-mast Tuk to

jata dikhai dewe ranj-o-KHumar-e-ashiq

kya bojh bhaari se main nakaam kaTta hun

duniya se hai nirala kuchh karobar-e-ashiq

is parde mein gham-e-dil kahta hai 'mir' apna

kya sher-o-shaeri hai yaro shiar-e-ashiq