aise mahrum gae hum to giraftar-e-chaman

aise mahrūm ga.e ham to giraftār-e-chaman

ki muue qaid meñ dīvār-ba-dīvār-e-chaman

siine par daaġh kā ahvāl maiñ pūchhūñ huuñ nasīm

ye bhī taḳhta kabhū hovegā sazā-vār-e-chaman

bāġhbāñ baaġh ijāre hī agar denā thā

the zar-e-dāġh se ham bhī to ḳharīdār-e-chaman

ve gunahgār hamīñ haiñ ki jinheñ kahte haiñ

āshiq-e-zār-e-chaman murġh-e-giraftār-e-chaman

ḳhuun Tapke hai paḌā nok se har-yak kī hanūz

kis sitam-dīda kī mizhgāñ haiñ tah-e-ḳhār-e-chaman

bāġhbāñ ham se ḳhushūnat se na pesh aaya kar

āqibat nāla-kashāñ bhī to haiñ darkār-e-chaman

kam nahīñ hai dil-e-pur-dāġh bhī ai murġh-e-asīr

gul meñ kyā hai jo huā hai tū talabgār-e-chaman

gul par aisī to paḌī os ḳhizāñ meñ ki nasīm

sard hī ho ga.ī vaañ garmī-e-bāzār-e-chaman

kyā jazā Thahrtī hai dekhiye kal hashr ko 'mīr'

daaġh har ek mire dil pe hai ḳhūñ-dār-e-chaman

aise mahrum gae hum to giraftar-e-chaman

ki mue qaid mein diwar-ba-diwar-e-chaman

sine par dagh ka ahwal main puchhun hun nasim

ye bhi taKHta kabhu howega saza-war-e-chaman

baghban bagh ijare hi agar dena tha

the zar-e-dagh se hum bhi to KHaridar-e-chaman

we gunahgar hamin hain ki jinhen kahte hain

aashiq-e-zar-e-chaman murgh-e-giraftar-e-chaman

KHun Tapke hai paDa nok se har-yak ki hanuz

kis sitam-dida ki mizhgan hain tah-e-KHar-e-chaman

baghban hum se KHushunat se na pesh aaya kar

aaqibat nala-kashan bhi to hain darkar-e-chaman

kam nahin hai dil-e-pur-dagh bhi ai murgh-e-asir

gul mein kya hai jo hua hai tu talabgar-e-chaman

gul par aisi to paDi os KHizan mein ki nasim

sard hi ho gai wan garmi-e-bazar-e-chaman

kya jaza Thahrti hai dekhiye kal hashr ko 'mir'

dagh har ek mere dil pe hai KHun-dar-e-chaman