bagh go sabz hua ab sar-e-gulzar kahan

baaġh go sabz huā ab sar-e-gulzār kahāñ

dil kahāñ vaqt kahāñ umr kahāñ yaar kahāñ

tum to ab aane ko phir kah chale ho kal lekin

be-kal aisā hī rahā shab to ye bīmār kahāñ

dil kī ḳhvāhish ho kisū ko to kamī dil kī nahīñ

ab yahī jins bahut hai pa ḳharīdār kahāñ

ḳhaak yaañ chhānte hī kyoñ na phiro dil ke liye

aisā pahuñche hai baham phir koī ġham-ḳhvār kahāñ

dam-zadan maslahat-e-vaqt nahīñ ai hamdam

jī meñ kyā kyā hai mire par lab-e-iz.hār kahāñ

shaiḳh ke aane hī kī der hai maiḳhāne meñ phir

sub.ha sajjāda kahāñ jubba-o-dastār kahāñ

ham se nā-kas to bahut phirte haiñ jī dete vale

zaḳhm-e-teġh us ke uThāne kā sazā-vār kahāñ

tū ne bhī gird-e-ruḳh-e-surḳh nikālā ḳhat-e-sabz

bāġh-e-shādāb-e-jahāñ meñ gul-e-be-e-ḳhār kahāñ

ḳhabt ne aql ke sar-rishte kiye gum saare

ab jo DhūñDo to garebāñ meñ koī taar kahāñ

go ki gardan ta.iiñ yaañ koī lahū meñ baiThe

haath uThātā hai jafā se vo sitamgār kahāñ

Duubā lohū meñ paḌā thā hamagī paikar-e-'mīr'

ye na jaanā ki lagī zulm kī talvār kahāñ

bagh go sabz hua ab sar-e-gulzar kahan

dil kahan waqt kahan umr kahan yar kahan

tum to ab aane ko phir kah chale ho kal lekin

be-kal aisa hi raha shab to ye bimar kahan

dil ki KHwahish ho kisu ko to kami dil ki nahin

ab yahi jins bahut hai pa KHaridar kahan

KHak yan chhante hi kyon na phiro dil ke liye

aisa pahunche hai baham phir koi gham-KHwar kahan

dam-zadan maslahat-e-waqt nahin ai hamdam

ji mein kya kya hai mere par lab-e-izhaar kahan

shaiKH ke aane hi ki der hai maiKHane mein phir

subha sajjada kahan jubba-o-dastar kahan

hum se na-kas to bahut phirte hain ji dete wale

zaKHm-e-tegh us ke uThane ka saza-war kahan

tu ne bhi gird-e-ruKH-e-surKH nikala KHat-e-sabz

bagh-e-shadab-e-jahan mein gul-e-be-e-KHar kahan

KHabt ne aql ke sar-rishte kiye gum sare

ab jo DhunDo to gareban mein koi tar kahan

go ki gardan tain yan koi lahu mein baiThe

hath uThata hai jafa se wo sitamgar kahan

Duba lohu mein paDa tha hamagi paikar-e-'mir'

ye na jaana ki lagi zulm ki talwar kahan