bad-zaban ho jaise KHush-uslub ho

bad-zabāñ ho jaise ḳhush-uslūb ho

kyā kaheñ jo kuchh ki ho tum ḳhuub ho

be-naqābī us kī hai ham par sitam

lā.iye muñh par to vo mahjūb ho

aisā shahr-e-husn hī hai tāza-rasm

dostī bāham jahāñ ma.ayūb ho

matlab-e-umda hai dil le to rakho

gaah bāshad tum ko bhī matlūb ho

chāhiye hai aur kuchh āshiq ko kyā

jaan kā ḳhvāhāñ agar mahbūb ho

lohū piinā jaan khānā dekhiye

kyā mizāj-e-ishq meñ marġhūb ho

jo kaho ho so muḳhālif aql ke

'mīr' sāhib tum magar majzūb ho

bad-zaban ho jaise KHush-uslub ho

kya kahen jo kuchh ki ho tum KHub ho

be-naqabi us ki hai hum par sitam

laiye munh par to wo mahjub ho

aisa shahr-e-husn hi hai taza-rasm

dosti baham jahan mayub ho

matlab-e-umda hai dil le to rakho

gah bashad tum ko bhi matlub ho

chahiye hai aur kuchh aashiq ko kya

jaan ka KHwahan agar mahbub ho

lohu pina jaan khana dekhiye

kya mizaj-e-ishq mein marghub ho

jo kaho ho so muKHalif aql ke

'mir' sahib tum magar majzub ho