bahaar aai khile gul phul shayad bagh-o-sahra mein

bahār aa.ī khile gul phuul shāyad bāġh-o-sahrā meñ

jhalak sī mārtī hai kuchh siyāhī dāġh-e-saudā meñ

nifāq-e-mardumāñ 'ājiz se hai zo'm-e-takabbur par

kahūñ kyā ittifāq aisā bhī ho jaatā hai duniyā meñ

numūdārī hamārī bekalī se ek chashmak hai

Thaharnā barq sā apnā hai ho chuknā usī jā meñ

suḳhan das pāñch yaañ haiñ jam' kis husn-e-latāfat se

tafāvut hai mire majmū'a-o-'aqd-e-surayyā meñ

kuaañ dekhā na koī ġhaar maiñ ne shauq ke maare

ba-'ainih raah andhā sā chalā us kī tamanna meñ

bahut thā shor-e-vahshat sar meñ mere soch ne terī

likhī tasvīr to zanjīr pahle khīñch lī pā meñ

judā.ī ke ta'ab khīñche nahīñ haiñ 'mīr' raazī huuñ

jalāveñ aag meñ yā mujh ko pheñkeñ qa’r-e-dariyā meñ

bahaar aai khile gul phul shayad bagh-o-sahra mein

jhalak si marti hai kuchh siyahi dagh-e-sauda mein

nifaq-e-marduman 'ajiz se hai zo'm-e-takabbur par

kahun kya ittifaq aisa bhi ho jata hai duniya mein

numudari hamari bekali se ek chashmak hai

Thaharna barq sa apna hai ho chukna usi ja mein

suKHan das panch yan hain jam' kis husn-e-latafat se

tafawut hai mere majmu'a-o-'aqd-e-surayya mein

kuan dekha na koi ghaar main ne shauq ke mare

ba-'ainih rah andha sa chala us ki tamanna mein

bahut tha shor-e-wahshat sar mein mere soch ne teri

likhi taswir to zanjir pahle khinch li pa mein

judai ke ta'ab khinche nahin hain 'mir' raazi hun

jalawen aag mein ya mujh ko phenken qa’r-e-dariya mein