be-mehr-o-wafa hai wo kya rasm-e-wafa jaane

be-mehr-o-vafā hai vo kyā rasm-e-vafā jaane

ulfat se mohabbat se mil baiThnā kyā jaane

dil dhaḌke hai jaate kuchh but-ḳhāne se ka.abe ko

is raah meñ pesh aave kyā ham ko ḳhudā jaane

hai mahv-e-ruḳh apnā tū ā.īne meñ har saa.at

sūrat hai jo kuchh dil kī so terī balā jaane

kuchh us kī bañdhī muTThī is baaġh meñ guzre hai

jo zaḳhm-e-jigar apne juuñ ġhuncha chhupā jaane

kyā siine ke jalne ko hañs hañs ke uḌātā huuñ

jab aag koī ghar ko is taur lagā jaane

maiñ miTTī bhī le jā.ūñ darvāze kī us ke to

is dard-e-mohabbat kī jo koī davā jaane

apne ta.iiñ bhī khānā ḳhālī nahīñ lazzat se

kyā jaane havas-pesha chakkhe to maza jaane

yuuñ shahr meñ bahutere āzār-dahinde haiñ

tab jāniye jab koī is Dhab se satā jaane

kyā jānūñ rakho roze yā daarū piyo shab ko

kirdār vahī achchhā tū jis ko bhalā jaane

āgāh nahīñ insāñ ai 'mīr' navishte se

kyā chāhiye hai phir jo tāle.a kā likhā jaane

be-mehr-o-wafa hai wo kya rasm-e-wafa jaane

ulfat se mohabbat se mil baiThna kya jaane

dil dhaDke hai jate kuchh but-KHane se kabe ko

is rah mein pesh aawe kya hum ko KHuda jaane

hai mahw-e-ruKH apna tu aaine mein har saat

surat hai jo kuchh dil ki so teri bala jaane

kuchh us ki bandhi muTThi is bagh mein guzre hai

jo zaKHm-e-jigar apne jun ghuncha chhupa jaane

kya sine ke jalne ko hans hans ke uData hun

jab aag koi ghar ko is taur laga jaane

main miTTi bhi le jaun darwaze ki us ke to

is dard-e-mohabbat ki jo koi dawa jaane

apne tain bhi khana KHali nahin lazzat se

kya jaane hawas-pesha chakkhe to maza jaane

yun shahr mein bahutere aazar-dahinde hain

tab jaaniye jab koi is Dhab se sata jaane

kya jaanun rakho roze ya daru piyo shab ko

kirdar wahi achchha tu jis ko bhala jaane

aagah nahin insan ai 'mir' nawishte se

kya chahiye hai phir jo talea ka likha jaane