begana-waz’ barson is shahr mein raha hun

begāna-vaz’ barsoñ is shahr meñ rahā huuñ

bhāgūñ huuñ duur sab se maiñ kis kā āshnā huuñ

pūchhā kiye haiñ mujh se gul barg lab ko tere

bulbul ke haath jab maiñ gulzār meñ lagā huuñ

ab kār-e-shauq dekhūñ pahuñche mirā kahāñ tak

qāsid ke pīchhe maiñ bhī be-tāqat uTh chalā huuñ

tujh se matā'-e-ḳhush kā kyūñkar na huuñ mu’arrif

yūsuf ke haath pyāre kuchh maiñ nahīñ bikā huuñ

gul-phūl koī kab tak jhaḌ jhaḌ ke girte dekhe

is baaġh meñ bahut ab juuñ ġhuncha maiñ rukā huuñ

kyā kyā kiyā ta.ammul is fikr meñ gayā ghul

samjhā na aap ko maiñ kyā jāniye ki kyā huuñ

hotā hai garm kyā tū ai āftāb-e-ḳhūbī

ek-ādh dam meñ maiñ to shabnam-namat havā huuñ

piirī se jhukte jhukte pahuñchā huuñ ḳhaak tak maiñ

vo sarkashī kahāñ hai ab to bahut dabā huuñ

mujh ko balā hai vahshat ai 'mīr' duur us se

jāgah se jab uThā huuñ āshob sā uThā huuñ

begana-waz’ barson is shahr mein raha hun

bhagun hun dur sab se main kis ka aashna hun

puchha kiye hain mujh se gul barg lab ko tere

bulbul ke hath jab main gulzar mein laga hun

ab kar-e-shauq dekhun pahunche mera kahan tak

qasid ke pichhe main bhi be-taqat uTh chala hun

tujh se mata'-e-KHush ka kyunkar na hun mu’arrif

yusuf ke hath pyare kuchh main nahin bika hun

gul-phul koi kab tak jhaD jhaD ke girte dekhe

is bagh mein bahut ab jun ghuncha main ruka hun

kya kya kiya tammul is fikr mein gaya ghul

samjha na aap ko main kya jaaniye ki kya hun

hota hai garm kya tu ai aaftab-e-KHubi

ek-adh dam mein main to shabnam-namat hawa hun

piri se jhukte jhukte pahuncha hun KHak tak main

wo sarkashi kahan hai ab to bahut daba hun

mujh ko bala hai wahshat ai 'mir' dur us se

jagah se jab uTha hun aashob sa uTha hun