chah mein dil par zulm-o-sitam hai jaur-o-jafa hai kya kya kuchh

chaah meñ dil par zulm-o-sitam hai jaur-o-jafā hai kyā kyā kuchh

dard-o-alam hai kulfat-o-ġham hai ranj-o-balā hai kyā kyā kuchh

āshiq ke mar jaane ke asbāb bahut rusvā.ī meñ

dil bhī lagā hai sharm-o-hayā hai mehr-o-vafā hai kyā kyā kuchh

ishq ne de kar aag yakāyak shahr-e-tan ko phūñk diyā

dil to jalā hai dimāġh jalā hai aur jalā hai kyā kyā kuchh

dil lene ko farefta ke bahterā kuchh hai yaar kane

ġhamza ishva chashmak chitvan nāz-o-adā hai kyā kyā kuchh

kyā kyā dīda-darā.ī sī tum karte rahe is aalam meñ

tum se aage suno ho sāhib nahīñ huā hai kyā kyā kuchh

hasrat-e-vasl andoh-e-judā.ī ḳhvāhish kāvish zauq-o-shauq

yuuñ to chalā huuñ akelā lekin saath chalā hai kyā kyā kuchh

kyā kahiye jab maiñ ne kahā hai 'mīr' hai maġhrūr is par tū

apnī zabāñ mat khol to un ne aur kahā hai kyā kyā kuchh

chah mein dil par zulm-o-sitam hai jaur-o-jafa hai kya kya kuchh

dard-o-alam hai kulfat-o-gham hai ranj-o-bala hai kya kya kuchh

aashiq ke mar jaane ke asbab bahut ruswai mein

dil bhi laga hai sharm-o-haya hai mehr-o-wafa hai kya kya kuchh

ishq ne de kar aag yakayak shahr-e-tan ko phunk diya

dil to jala hai dimagh jala hai aur jala hai kya kya kuchh

dil lene ko farefta ke bahtera kuchh hai yar kane

ghamza ishwa chashmak chitwan naz-o-ada hai kya kya kuchh

kya kya dida-darai si tum karte rahe is aalam mein

tum se aage suno ho sahib nahin hua hai kya kya kuchh

hasrat-e-wasl andoh-e-judai KHwahish kawish zauq-o-shauq

yun to chala hun akela lekin sath chala hai kya kya kuchh

kya kahiye jab main ne kaha hai 'mir' hai maghrur is par tu

apni zaban mat khol to un ne aur kaha hai kya kya kuchh