chup rah ab nalon se ai bulbul na kar aazar-e-dil

chup rah ab nāloñ se ai bulbul na kar āzār-e-dil

kam-dimāġhī hai bahut mujh ko ki huuñ bīmār-e-dil

ibtidā-e-ḳhabt meñ hotā tadāruk kuchh to thā

ab koī sañbhle hai mujh se vahshat-e-bisyār-e-dil

yak tavajjoh meñ rahe hai sair us kī arsh par

aql meñ aate nahīñ haiñ turfa turfa kār-e-dil

baaġh se le dasht tak rakhte haiñ ik shor-e-ajab

ham asīrān-e-qafas ke nāla-hā-e-zār-e-dil

is subuk-rūhī pe juuñ bād-e-sahar dar dar phire

zindagī ab yaar bin apnī huī hai bār-e-dil

tangī-o-vus.at se is kī ai ibārat-sāz fahm

'mīr' kuchh samjhe ga.e na ma.anī-e-asrār-e-dil

chup rah ab nalon se ai bulbul na kar aazar-e-dil

kam-dimaghi hai bahut mujh ko ki hun bimar-e-dil

ibtida-e-KHabt mein hota tadaruk kuchh to tha

ab koi sanbhle hai mujh se wahshat-e-bisyar-e-dil

yak tawajjoh mein rahe hai sair us ki arsh par

aql mein aate nahin hain turfa turfa kar-e-dil

bagh se le dasht tak rakhte hain ek shor-e-ajab

hum asiran-e-qafas ke nala-ha-e-zar-e-dil

is subuk-ruhi pe jun baad-e-sahar dar dar phire

zindagi ab yar bin apni hui hai bar-e-dil

tangi-o-wusat se is ki ai ibarat-saz fahm

'mir' kuchh samjhe gae na mani-e-asrar-e-dil