dard-o-gham se dil kabhu fursat na pae

dard-o-ġham se dil kabhū fursat na paa.e

ye sa’ūbat kab talak koī uThā.e

tifl-e-tah-bāzār kā 'āshiq huuñ maiñ

dil-faroshī koī mujh se siikh jaa.e

zaar ronā chashm kā kab dekhte

dekheñ haiñ lekin ḳhudā jo kuchh dikhā.e

kab talak chāk-e-qafas se jhāñkiye

barg-e-gul yaañ bhī sabā koī to laa.e

kab se ham ko hai talāsh-e-dast-e-ġhaib

tā kamar-pech us kā apne haath aa.e

us kī apnī bantī hī hargiz nahīñ

bigḌī sohbat aisī kyā koī banā.e

jo likhī qismat meñ zillat ho so ho

ḳhatt-e-peshānī koī kyūñkar miTā.e

daaġh hai murġh-e-chaman pā.īz se

dil na ho jaltā jo us kā gul na khaa.e

zaḳhm-e-sīna merā us ke haath kā

ho koī rijhvāḌ to us ko rijhā.e

'mīr' aksar 'umr ke afsos meñ

zer-e-lab bālā-e-lab hai haa.e vaa.e

dard-o-gham se dil kabhu fursat na pae

ye sa’ubat kab talak koi uThae

tifl-e-tah-bazar ka 'ashiq hun main

dil-faroshi koi mujh se sikh jae

zar rona chashm ka kab dekhte

dekhen hain lekin KHuda jo kuchh dikhae

kab talak chaak-e-qafas se jhankiye

barg-e-gul yan bhi saba koi to lae

kab se hum ko hai talash-e-dast-e-ghaib

ta kamar-pech us ka apne hath aae

us ki apni banti hi hargiz nahin

bigDi sohbat aisi kya koi banae

jo likhi qismat mein zillat ho so ho

KHatt-e-peshani koi kyunkar miTae

dagh hai murgh-e-chaman paiz se

dil na ho jalta jo us ka gul na khae

zaKHm-e-sina mera us ke hath ka

ho koi rijhwaD to us ko rijhae

'mir' aksar 'umr ke afsos mein

zer-e-lab baala-e-lab hai hae wae