dekh to dil ki jaan se uThta hai

dekh to dil ki jaañ se uThtā hai

ye dhuāñ sā kahāñ se uThtā hai

gor kis diljale kī hai ye falak

shola ik sub.h yaañ se uThtā hai

ḳhāna-e-dil se zīnhār na jā

koī aise makāñ se uThtā hai

naala sar khīñchtā hai jab merā

shor ik āsmāñ se uThtā hai

laḌtī hai us kī chashm-e-shoḳh jahāñ

ek āshob vaañ se uThtā hai

sudh le ghar kī bhī shola-e-āvāz

duud kuchh āshiyāñ se uThtā hai

baiThne kaun de hai phir us ko

jo tire āstāñ se uThtā hai

yuuñ uThe aah us galī se ham

jaise koī jahāñ se uThtā hai

ishq ik 'mīr' bhārī patthar hai

kab ye tujh nā-tavāñ se uThtā hai

dekh to dil ki jaan se uThta hai

ye dhuan sa kahan se uThta hai

gor kis diljale ki hai ye falak

shola ek subh yan se uThta hai

KHana-e-dil se zinhaar na ja

koi aise makan se uThta hai

nala sar khinchta hai jab mera

shor ek aasman se uThta hai

laDti hai us ki chashm-e-shoKH jahan

ek aashob wan se uThta hai

sudh le ghar ki bhi shola-e-awaz

dud kuchh aashiyan se uThta hai

baiThne kaun de hai phir us ko

jo tere aastan se uThta hai

yun uThe aah us gali se hum

jaise koi jahan se uThta hai

ishq ek 'mir' bhaari patthar hai

kab ye tujh na-tawan se uThta hai