dil bhi bhara rahta hai mera ji bhi runDha kuchh jata hai

dil bhī bharā rahtā hai merā jī bhī ruñDhā kuchh jaatā hai

kyā jānūñ maiñ ro.ūñgā kaisā dariyā chaḌhtā aatā hai

sach hai vo jo kahā kartā hai kaun hai tū kyā samjhe hameñ

begāne to haiñ hī ham ve naaoñ kā chaah kā naatā hai

tū bulbul āzurda na ho gul phuul se bāġh-e-bahārāñ meñ

ranj-kash-e-ulfat hai 'āshiq jī apnā bahlātā hai

'ishq-o-mohabbat kyā jānūñ maiñ lekin itnā jānūñ huuñ

andar hī siine meñ mere dil ko koī khātā hai

'āshiq apnā jaan liyā hai un ne shāyad 'mīr' hameñ

dekh bharī majlis meñ apnī ham hī se sharmātā hai

dil bhi bhara rahta hai mera ji bhi runDha kuchh jata hai

kya jaanun main rounga kaisa dariya chaDhta aata hai

sach hai wo jo kaha karta hai kaun hai tu kya samjhe hamein

begane to hain hi hum we naon ka chah ka nata hai

tu bulbul aazurda na ho gul phul se bagh-e-bahaaran mein

ranj-kash-e-ulfat hai 'ashiq ji apna bahlata hai

'ishq-o-mohabbat kya jaanun main lekin itna jaanun hun

andar hi sine mein mere dil ko koi khata hai

'ashiq apna jaan liya hai un ne shayad 'mir' hamein

dekh bhari majlis mein apni hum hi se sharmata hai