dil dimagh-o-jigar ye sab ek bar

dil dimāġh-o-jigar ye sab ik baar

kaam aa.e firāq meñ ai yaar

kyoñ na ho zo.af ġhālib a.azā par

mar ga.e haiñ qushūn ke sardār

gul-e-pazhmurda kā nahīñ mamnūn

ham asīroñ kā gosha-e-dastār

mat nikal ghar se ham bhī raazī haiñ

dekh leñge kabhū sar-e-bāzār

saiñkaḌoñ harf haiñ girah dil meñ

par kahāñ pā.iye lab-e-iz.hār

sair kar dasht-e-ishq kā gulshan

ġhunche ho ho rahe haiñ sau sau ḳhaar

roz-e-mahshar hai raat hijrāñ kī

aisī ham zindagī se haiñ bezār

bahs-e-nāla bhī kījiyo bulbul

pahle paidā to kar lab-e-guftār

chāk-e-dil par haiñ chashm-e-sad-ḳhūbāñ

kyā karūñ yak-anār-o-sad bīmār

shukr kar dāġh-e-dil kā ai ġhāfil

kis ko dete haiñ dīda-e-bedār

go ġhazal ho ga.ī qasīda sī

āshiqoñ kā hai tūl-e-harf shi.ār

qaaf

har sahar lag chalī tū hai to nasīm

ai siyah-mast-e-nāz Tuk hushiyār

shāḳhsāne hazār nikleñge

jo gayā us kī zulf kā ik taar

qaaf

vājib-ul-qatl is qadar to huuñ

ki mujhe dekh kar kahe hai pukār

ye to aaya na sāmne mere

laao merī miyāñ sipar talvār

qaaf

aa ziyārat ko qabr-e-āshiq par

ik tarah kā hai yaañ bhī josh-e-bahār

nikle hai merī ḳhaak se nargis

ya.anī ab tak hai hasrat-e-dīdār

qaaf

'mīr' sāhib zamāna nāzuk hai

donoñ hāthoñ se thāmiye dastār

sahl sī zindagī pe kaam ke tiiñ

apne uupar na kījiye dushvār

chaar din kā hai maj.hala ye sab

sab se rakhiye sulūk hī nā-chār

qaaf

koī aisā gunāh aur nahīñ

ye ki kiije sitam kisī par yaar

vaañ jahāñ ḳhaak ke barābar hai

qadr-e-haft-āsmān-e-zulm-shi.ār

yahī darḳhvāst pās-e-dil kī hai

nahīñ roza namāz kuchh darkār

dar-e-masjid pe halqa-zan ho tum

ki raho baiTh ḳhāna-e-ḳhummār

jī meñ aave so kījiyo pyāre

lek hojo na darpai-e-āzār

hāsil-e-do-jahān hai yak harf

ho mirī jaan aage tum muḳhtār

dil dimagh-o-jigar ye sab ek bar

kaam aae firaq mein ai yar

kyon na ho zoaf ghaalib aaza par

mar gae hain qushun ke sardar

gul-e-pazhmurda ka nahin mamnun

hum asiron ka gosha-e-dastar

mat nikal ghar se hum bhi raazi hain

dekh lenge kabhu sar-e-bazar

sainkaDon harf hain girah dil mein

par kahan paiye lab-e-izhaar

sair kar dasht-e-ishq ka gulshan

ghunche ho ho rahe hain sau sau KHar

roz-e-mahshar hai raat hijran ki

aisi hum zindagi se hain bezar

bahs-e-nala bhi kijiyo bulbul

pahle paida to kar lab-e-guftar

chaak-e-dil par hain chashm-e-sad-KHuban

kya karun yak-anar-o-sad bimar

shukr kar dagh-e-dil ka ai ghafil

kis ko dete hain dida-e-bedar

go ghazal ho gai qasida si

aashiqon ka hai tul-e-harf shiar

qaf

har sahar lag chali tu hai to nasim

ai siyah-mast-e-naz Tuk hushiyar

shaKHsane hazar niklenge

jo gaya us ki zulf ka ek tar

qaf

wajib-ul-qatl is qadar to hun

ki mujhe dekh kar kahe hai pukar

ye to aaya na samne mere

lao meri miyan sipar talwar

qaf

aa ziyarat ko qabr-e-ashiq par

ek tarah ka hai yan bhi josh-e-bahaar

nikle hai meri KHak se nargis

yani ab tak hai hasrat-e-didar

qaf

'mir' sahib zamana nazuk hai

donon hathon se thamiye dastar

sahl si zindagi pe kaam ke tin

apne upar na kijiye dushwar

chaar din ka hai majhala ye sab

sab se rakhiye suluk hi na-chaar

qaf

koi aisa gunah aur nahin

ye ki kije sitam kisi par yar

wan jahan KHak ke barabar hai

qadr-e-haft-asman-e-zulm-shiar

yahi darKHwast pas-e-dil ki hai

nahin roza namaz kuchh darkar

dar-e-masjid pe halqa-zan ho tum

ki raho baiTh KHana-e-KHummar

ji mein aawe so kijiyo pyare

lek hojo na darpai-e-azar

hasil-e-do-jahan hai yak harf

ho meri jaan aage tum muKHtar