dil ke gae bekas kahlae aisa kahan hamdam hai ab

dil ke ga.e bekas kahlā.e aisā kahāñ hamdam hai ab

kaun aise mahrūm ġhamīñ kā hamrāz o mahram hai ab

sīna-zanī se ġham-zadagī hai sar dhunnā hai ronā hai

dil jo hamārā ḳhuun huā hai is se balā mātam hai ab

sun kar haal kisū ke dil kā ronā hī mujh ko aatā thā

ya.anī kabhū jo kuḌhtā thā maiñ vo ronā har dam hai ab

zardī-e-chehra tan kī nizārī bīmārī phir chāhat hai

dil meñ ġham hai mizhgāñ nam haiñ haal bahut darham hai ab

dekheñ din kaTte haiñ kyūñkar rāteñ kyūñke guzartī haiñ

betābi hai ziyāda ziyāda sabr bahut kam-kam hai ab

ishq hamārā aah na pūchho kyā kyā rang badaltā hai

ḳhuun huā dil daaġh huā phir dard huā phir ġham hai ab

milne vaalo phir miliyegā hai vo ālam-e-dīgar meñ

'mīr' faqīr ko sukr hai ya.anī mastī kā aalam hai ab

dil ke gae bekas kahlae aisa kahan hamdam hai ab

kaun aise mahrum ghamin ka hamraaz o mahram hai ab

sina-zani se gham-zadagi hai sar dhunna hai rona hai

dil jo hamara KHun hua hai is se bala matam hai ab

sun kar haal kisu ke dil ka rona hi mujh ko aata tha

yani kabhu jo kuDhta tha main wo rona har dam hai ab

zardi-e-chehra tan ki nizari bimari phir chahat hai

dil mein gham hai mizhgan nam hain haal bahut darham hai ab

dekhen din kaTte hain kyunkar raaten kyunke guzarti hain

betabi hai ziyaada ziyaada sabr bahut kam-kam hai ab

ishq hamara aah na puchho kya kya rang badalta hai

KHun hua dil dagh hua phir dard hua phir gham hai ab

milne walo phir miliyega hai wo aalam-e-digar mein

'mir' faqir ko sukr hai yani masti ka aalam hai ab