dil KHun hua tha yaksar pani hua jigar sab

dil ḳhuuñ huā thā yaksar paanī huā jigar sab

ḳhūñ-basta rahtiyāñ thiiñ palkeñ so ab haiñ tar sab

yārab kidhar ga.e ve jo ādmī-ravish the

uujaḌ dikhā.ī de haiñ shahr-o-dih-o-nagar sab

harf-o-suḳhan se mutlaq yaañ guftugū nahīñ hai

pyāde savār ham ko aa.e nazar nafar sab

'ālam ke logoñ kā hai tasvīr kā sā 'ālam

zāhir khulī haiñ āñkheñ lekin haiñ be-ḳhabar sab

'mīr' is ḳharābe meñ kyā ābād hove koī

dīvār-o-dar gire haiñ vīrāñ paḌe haiñ ghar sab

dil KHun hua tha yaksar pani hua jigar sab

KHun-basta rahtiyan thin palken so ab hain tar sab

yarab kidhar gae we jo aadmi-rawish the

ujaD dikhai de hain shahr-o-dih-o-nagar sab

harf-o-suKHan se mutlaq yan guftugu nahin hai

pyaade sawar hum ko aae nazar nafar sab

'alam ke logon ka hai taswir ka sa 'alam

zahir khuli hain aankhen lekin hain be-KHabar sab

'mir' is KHarabe mein kya aabaad howe koi

diwar-o-dar gire hain viran paDe hain ghar sab