dil to gudaz sab hai kis ko koi kahe dil

dil to gudāz sab hai kis ko koī kahe dil

nazdīk hai ki kahiye ab haa.e haa.e ai dil

is ishq meñ nikāle maiñ ne bhī naam kyā kyā

ḳhāna-ḳharāb-o-rusvā be-dīn aur be-dil

juuñ abr roiye kyā dil barq sā hai be-kal

rakkhe hī rahiye aksar haath us pe jo rahe dil

dil go ki dāġh-o-ḳhūñ hai rahtī hai laag tujh se

insāf kar ki jā kar dikhlāveñ phir kise dil

dil ke sabāt se ham naumīd ho rahe haiñ

ab vo samāñ hai ḳhuuñ ho ruḳhsār par bahe dil

āshiq kahāñ hue ham pān.choñ havās kho.e

is maḳhmase meñ az-bas hairāñ hai kyā kare dil

jaatā hai kyā khiñchā kuchh dekh us ko naaz kartā

aatā nahīñ hameñ ḳhush andāz-e-be-tah-e-dil

ham dardmand apnā soz-e-darūñ hai behad

yā-rab hamāre uupar kis martabe jale dil

ai 'mīr' ise hai nisbat kin halqa halqa mū se

betāb kuchh hai gaahe pur-pech hai gahe dil

dil to gudaz sab hai kis ko koi kahe dil

nazdik hai ki kahiye ab hae hae ai dil

is ishq mein nikale main ne bhi nam kya kya

KHana-KHarab-o-ruswa be-din aur be-dil

jun abr roiye kya dil barq sa hai be-kal

rakkhe hi rahiye aksar hath us pe jo rahe dil

dil go ki dagh-o-KHun hai rahti hai lag tujh se

insaf kar ki ja kar dikhlawen phir kise dil

dil ke sabaat se hum naumid ho rahe hain

ab wo saman hai KHun ho ruKHsar par bahe dil

aashiq kahan hue hum panchon hawas khoe

is maKHmase mein az-bas hairan hai kya kare dil

jata hai kya khincha kuchh dekh us ko naz karta

aata nahin hamein KHush andaz-e-be-tah-e-dil

hum dardmand apna soz-e-darun hai behad

ya-rab hamare upar kis martabe jale dil

ai 'mir' ise hai nisbat kin halqa halqa mu se

betab kuchh hai gahe pur-pech hai gahe dil