falak ka munh nahin is fitne ke uThane ka

falak kā muñh nahīñ is fitne ke uThāne kā

sitam-sharīk tirā naaz hai zamāne kā

hamāre zo.af kī hālat se dil qavī rakhiyo

kahīñ ḳhayāl nahīñ yaañ bahāl aane kā

tirī hī raah meñ maare ga.e sabhī āḳhir

safar to ham ko hai darpesh jī se jaane kā

bisān-e-sham.a jo majlis se ham ga.e to ga.e

surāġh kiijo na phir tū nishān paane kā

chaman meñ dekh nahīñ saktī Tuk ki chubhtā hai

jigar meñ barq ke kāñTā mujh āshiyāne kā

Tuk aa to tā-sar-e-bālīñ na kar ta'allul kyā

tujhe bhī shoḳh yahī vaqt hai bahāne kā

sarāhā un ne tirā haath jin ne dekhā zaḳhm

shahīd huuñ maiñ tirī teġh ke lagāne kā

sharīf-e-makka rahā hai tamām umr ai shaiḳh

ye 'mīr' ab jo gadā hai sharāb-ḳhāne kā

falak ka munh nahin is fitne ke uThane ka

sitam-sharik tera naz hai zamane ka

hamare zoaf ki haalat se dil qawi rakhiyo

kahin KHayal nahin yan bahaal aane ka

teri hi rah mein mare gae sabhi aaKHir

safar to hum ko hai darpesh ji se jaane ka

bisan-e-shama jo majlis se hum gae to gae

suragh kijo na phir tu nishan pane ka

chaman mein dekh nahin sakti Tuk ki chubhta hai

jigar mein barq ke kanTa mujh aashiyane ka

Tuk aa to ta-sar-e-baalin na kar ta'allul kya

tujhe bhi shoKH yahi waqt hai bahane ka

saraha un ne tera hath jin ne dekha zaKHm

shahid hun main teri tegh ke lagane ka

sharif-e-makka raha hai tamam umr ai shaiKH

ye 'mir' ab jo gada hai sharab-KHane ka